'Nobeta Edaletî' yê keyeyê Şenyaşarî 721 rojî yo dewam kena 

2023-03-13 15:13:53


	 

	 

	RIHA - Çalakîya "Nobeta Edaletî" ya keyeyê Şenyaşarî 721 rojî yo dewam kena û çalakîya ewro de wina vatî: "Îqtîdar vernîya ke qalê edaletî bikero, wa vernê de vernîya Edlîyeyê Rihayî ra biewno û dima ra nê vatişî bikero."

	 

	Merdim û pawitoxê Parlamenterê AKPyî yê Rihayê Îbrahîm Halîl Yildiz 14ê hezîrana 2018ine de qezaya Pirsûsî yê Rihayî de hêrişê keyeyê Şenyaşarî kerd. Netîceyê hêrişî de mêrde û lajê Emîne Şenyaşare ameyî qetilkerdiş. Nê ser de Emîne Şenyaşar û lajê aye Ferît Şenyaşar 9ê adara 2021ine de vernîya Edlîyeyê Rihayî de dest bi çalakîya Nobeta Edaletî kerdî. Çalakîya keyeyê Şenyaşarî roja 721ine de dewam kena. Keye, ewros erê sibayî Pirsûs ra ame verê berê Edlîyeyê Rihayî û dest bi çalakîya xo kerd. Çalakî de pankartê “Seba Keyeyê Şenyaşarî Edalet” daliqnayî.

	 

	Çalakî de Ferît Şenyaşarî qisey kerd û ard vîr ke par aşma remezane de rojeyê xo verê berê edliyeyî de akerdê û wina vat: "Eke edalet bi ca nêro, ma do emser zî fitarîyê xo verê berê edlîyeyî de abikerê. Bingehê heme bawerîyan de edalet esto. Ma welatêk misilman de ciwîyenê. Îdarekarê dewlete zî nimajê xo kenê û wina aseno ke kesê bawermend ê. Lê misilmantî tena nimaj nîyo. Bingehê Îslamî û heme bawerîyan edalet o.”

	 

	Ferîtî, dîyar kerd ke dayîka aye bi 2 serrî yo verê berê edlîyeyî de waştişê edaletî kena û wina qedêna: "Des rojî dima do roje dest pêbikero. Dayîke êdî rincan bîya û wazena êdî fitarîya xo keyeyê xo, verê tornê xo de abikera. La eke edalet pê nêro, ma do emser zî fitarîya xo verê edlîyeyî de abikerê. Venga ma rayaumumî ra oyo ke paştdayîş bidê ma. Heto bîn ra prosesê weçînayîşî nêzdî beno. Gelo do yew sozê namzedê serekkomarîye yê îqtîdarî bibo edalet yan nê? Do bieşkê vajê ma sey yewbînan her kes bibî û biedalet têbigêrî? Îqtîdar vernîya ke qalê edaletî bikero, wa vernê de vernîya Edlîyeyê Rihayî biewno û dima ra nê vatişî bikero."