Do rihê 8ê Adare berê Newroze  

2023-03-12 10:16:29


	 

	 

	ÎZMÎR - Hemsereka HDPyî ya Îzmîrî Berna Çelîke da zanayîş ke do 8ê Adare berê Newroze û waştişanê xo berz bikerê.

	 

	Emser Newroze bi şîarê 'Her ca Newroze her ca azadî' do 43 merkezan de bêra pîrozkerdiş. Amadekarîya Newroze ke bi serkêşîya Partîya Demokratîke ya Şaran (HDP) do 19ê aşme de Îzmîr de Raşteyê Gundogduyî de saete 13.00î de pêra, dewam kena. 

	 

	Hemsereka HDPyî ya Îzmîrî Berna Çelîke derheqê babete de qisey kerd û vat ke do bi rihê 8ê Adare şêrê Newroze.

	 

	Bernaye qiseykerdişê xo de wina vat: "Îtîrazê ke 8ê Adare de vejîyayî raşte do Raşteyê Newroze de zî bêrê kerdiş. 8ê Adare de des hezaran cinîyî vejîyayî raşteyan. Cinîyî bi sloganê 'hukmat îstîfa' raşteyan lerzna. Ma do bi rihê 8ê Adare Newroze pêşwazî bikerê."

	 

	'Do waştişê azadî û xoverdayîşî berz bibo'

	 

	Bernaye dewamê qiseykerdişê xo de dîyar kerd ke Newroze emserrî dîyarîyê des hezaran kesê ke erdlerzî de dinyaya xo bedilnayî do bêra kerdiş û wina vat: "Newroze sey roşanê newerabîyayîşî yena pîrozkerdiş. Newroza emserrî hem do biba Newroza şînî û hem zî ya xoverdayîşî. Ma Newroza Îzmîrî de zî paştîdayîşê xo bidê hîskerdiş. Sewbîna do waştişê azadî û xoverdayîşî berz bibo."

	 

	Bernaye qiseykerdişê xo wina qedêna: "Amadekarîya weçînayîşî zî yena kerdiş. Bernameyê ma estê. Qezayan de kombîyayîş, zîyaretê keyeyan û vilakerdişê vilawekan esto. Nê xebatan de tena derheqê Newroze de vengdayîşêk çin o. Derheqê prosesî de zî vengdayîşêk esto. Wayîrvejîyayîşê Newroze do bêro vatiş. Ganî ma goreyê xesasîyetê prosesî raşteyan pirr bikerê. Ez vengê tewrbîyayîşê Newroze bi heme kesan kena."