
Tepişteya nêweşe ya girane Şîvekare nîna  veradayîş 

2023-03-10 15:15:18


	&nbsp;

	&nbsp;

	AMED - Tepişteya nêweşe ya girane Şîvekar Ataş ke lîsteyê tepişteyanê nêweşan ê giran de ca gêna, seba şertê zîndanî rewşa aye her ke şina giran bena û seba astengîyê ATKyî nîna tehlîyekerdiş.

	&nbsp;

	Rewşa tepişteyê nêweşan her ke şina giran bena û ne îmkanê dermankerdişî yenê awankerdiş û ne zî yenê veradayîş ke teber de bêrê tedawîkerdiş. Zîndanan de bi hezaran tepişteyê nêweşî estê û û seba raporê Sazgehê Tipê Edlî (ATK) yê sey ‘eşkena tepişte bimana' nînê veradayîş. Merdimê tepişteyan hemverê nê de Amed, Wan, Stenbol û Îzmîr de Nobeda Edaletî dabî destpêkerdiş û 4ê Çeleyî yê 2022ine de şî Anqara, partîyê sîyasî, rêxistinê komelê sivîlî zîyaret kerdî û dosyayêke derheqê rewşa tepişteyan ê 11 rûpel û 6 sernameyî pê ameyîne pêşkêş kerd. Yewa 38 tepişteyê dosya de ca girewtêne ya ke rewşa ci giran bî Şîvekar Ataşe bî.

	&nbsp;

	15 serrî ceza ci rê ameye birnayîş

	&nbsp;

	Şîvekare dewa Agaçlidere ya Sûrê Amedî de ameye dinya. 6 wayê û bira bî. Serranê 90î de keyeyê aye seba tedayê dewlete koçê Amedî keno. Şîvekare ke muhendisîyê Kompîturî wendêne, bi amancê serdayîşê embaza xo de 2016ine de şina Mûşê û uca de yena tepiştiş. Şîvekare ewil birerdî Tarsûsê Mersînî û dima ra Zîndanê Sîncanê Anqarayî û Bakirkoyê Stenbolî de mende. Şîvekare bi îdiayê endemîya rêxistine 15 serrî ceza ci rê ameye birnayîş. Şîvekare prosesê tepiştişî de hîrê rey hemverê binpaykerdişan kewte grevê vêşanîye.

	&nbsp;

	Şîvekare ke nêweşîya aye giran ê qelbî û tansîyonî esta zî nîna veradayîş.

	&nbsp;

	‘Sîstemî timî teda kerdêne'

	&nbsp;

	Dayîka Şîvekare, Rabîa Ataşe roportajê verê dabî de dîyar kerdebî ke serranê 90an de seba tedayî dewa xo ra vejîyayê û vat: “Leşkeran eştêne serê keyeyê ma û ma kuwayîne. Tutê mi hemverê nê tedayan bêveng nêmendî. Ma ameyî Amed û teda uca de zî dewam kerd. Tutê mi hemverê zulmî de keyeyê xo terk kerdî. Kênaya mi xoverdayoxe bî. Şîvekare şîne mekteb. Rojêke erey ameye. Mi vat, çira ti erey ameye? Aye zî vat, ‘komêke hêrişê embaza aye kerdo aye zî bêveng nêmenda."

	&nbsp;

	‘Kerdibî odaya bi sunger’

	&nbsp;

	Rabîaye dewam de wina vat: “6 rojan kênaya mi destbend mende. Walîyî eşkerayîye dabi û vatibi di kesî ameyê tepiştiş. Kênaya mi demêk amebî destbendkerdiş, çîyêk serde amebî vînayîş. Kênaya mi sucêk nêkerdibi. Kênaya mi sucdar kerdî û seba ke aye dayî tepiştiş xelate dayî înan. Kênaya mi berdî Zîndanê Sîncanî. Di serran kênaya mi uca de tepişte mende. Her zîndan de teda aye rê yeno kerdiş. Uca ra berdî zîndanê Tarsûsî. Tedayî tewr zêde bî. Uca ra şirawitî Amed û uca de zî tedayî zêde bî. Kênaya mi seba tedayan bêveng nêmende kerdî odaya bi sunger. Uca de bîrînî bedenê aye de virazîyayî. BEdenê aye pêro enfeksîyon girewt."

	&nbsp;

	‘Nêbenê nêweşxane’

	&nbsp;

	Rabîaye tewr peyîn wina qal kerd: “Kênaya mi verê tu çîyêk aye çinbî. Kênaya mi hema 25 serrî ya. Sere de nêweşîya qelbî, xeylêk nêweşîyê aye estê. Ez wazena pêro tepişteyê nêweşî bêrê veradayîş. Kênaya mi seba tansîyon û werimnayîşê qelbî her wext serê hişê xo ra şina. Seba emrê aye pîl nîyo emelîyat nêkenê. Ganî 20 rojan ra reyke şêro derzenî xo ro do. La seba demo ke pandemî estbî berdêne ardêne û kerdêne karantîna. Dermanê ke xebitnena bedenê aye masneno. Ez venga hîsgêrî kena. Wa tepişteyê nêweşî bêrê veradayîş."

	&nbsp;