Cinîyî vera gazê jehrinî de vejîyayî raşteyan 

2023-03-07 15:16:54


	 

	 

	MERKEZÊ XEBERAN - Rojhelatê Kurdistan û Îranî de xeylê tutê kênayî netîceyê hêrişê gazê kîmyewîye de ameyî qetilkerdiş. Cinîyî vera gazê jehrinî de vejîyayî raşteyan û bi sloganê “Jin, jiyan, azadî” rejîmî şermizar kerd.

	 

	Rojhelatê Kurdistan û Îranî de hemverê wendekaranê cinîyan de bi gazanê kîmyewîyan hêriş yeno kerdiş. Bi vengdayîşê Meclîsê Mamosteyanê Unîversîte cinîyî hemverê nê hêrişan de vejîyayî raşteyan. Cinîyî xeylê cayan de ameyî têhet û camêrdan zî paştî da çalakîye.

	 

	Bajarê Senendec yê Rojhelatê Kurdistanî de xeylê kesî vernîya Wezîrîya Perwerdeyî de ameyî têhet û hêrişê bi gazinanê kîmyewîyan yê hemverê tutanê kênayan de şermizar kerdî. Bado ke girse gam bi game gird bî û sloganê “Jin, jiyan, azadî” berz kerd, hêzê asayîşî yê rejîmî bi bombeye gazî hêriş kerdî. Girse sloganan berz kerd û vilayê kuçeyan bî û çalakîya xo dewam kerd. Xeylê cayanê cîyayan yê welatî de zî cinîyî vejîyayî raşteyan û rejim protesto kerdî. 

	 

	Se bîbî?

	 

	30ê Teşrîna Peyêne ra nata bajaranê Rojhelatê Kurdistan û Îranî de hemverê wendekaranê kênayan de bi gazê kîmyewîyan hêriş yeno kerdiş. Netîceyê nê hêrişan de 4 wendekarî dinyaya xo bedilnayî. Heta nika 33 bajaran de hêriş pê ameyî û derheqê kerdoxan de heta nika tu eşkerayî nêameye dayîş.