Dayîka tepişteyî: Tecrîd pêroyê komelî ser de tesîr viraşt 

2023-03-06 10:23:25


	 

	WAN - Binpaykerdişê heqan yê zîndanan roj bi roje zêdîyenê. Dayîka tepişteyî Cazîye Ceylane dîyar kerd ke sebebê pêro binpaykerdişanê kêfîyan tecrîd o û wina vat: "Şexsê Birêz Ocalanî de pêroyê komelî ser de tecrîd yeno rayraberdiş. Heta ke tecrîd nêwedarîyo do tu çîyêk baş nêbo."

	 

	23 aşmî yo ke Rayberê PKKyî Abdullah Ocalanî ra xebere nîna girewtiş û tecrîdo giran yê serê Abdullah Ocalanî tesîr pêroyê tepişteyanê sîyasîyan ser de keno."

	 

	Dayîka tepişteyo bi nameyê Mahsun Ceylanî ke zîndanê Asayîşo Berz yê Elezîzî de yeno tepiştiş, Cazîye Ceylane ya 65 serrî dîyar kerd ke lajê aye Mahsun tutîya xo ra nata xeylê bi aqil bî û mana dayêne cuye. Cazîyeye wina vat: "Lajê mi 2014 de ame tepiştiş. 8 serrî ya ke tepişte yo. Wexto ke ame tepiştiş berdî zîndanê Tîpa Lyî yê Kalkandere yê Rîze. Di serran bado ke uca de mend berdî Zîndanê Asayîşo Berz yê Elezîzî. 4 serrî yo ke uca de tepişte yo."

	 

	Pêvînayîş yenê astengkerdiş

	 

	Cazîyeye dîyar kerd ke tepişteyan keyeyê înan ra dûrî kenş û binpaykerdişê heqan her ke şino giran beno û wina vat: "Hewl danê ke pêvînayîş zî asteng bikerê. Lajê mi hucreyo yew kesî de yeno tepistiş. Nêverdêne telefon bikero. Ez şina pêvînayîş la nêverdenê ez lajê xo verike bikera. Nêverdayî ez fotograf bianca. Seba ke lajê mi ma ra dûrî yo ez şikin a. Tu heqêk nêdanî tepişteyan. Her reya ke ez şina vînena ke lajê mi kîlo dayo. Werdê başî nêdîyenê. Mecbur manenê kantîn ra bigêrê. Lazimîyan kantîn ra herînenê. Her çî bi kêfî yeno kerdiş. Zîndanan de caardişê kêfî estê."

	 

	Tecrîd pêroyê komelî ser de tesîr viraşt

	 

	Cazîyeye bale ant tecrîdo giran ke pêroyê komelî ser de tesîr viraşto ser û vat: "Şexsê Birêz Ocalanî de pêroyê komelî ser de tecrîd yeno rayraberdiş. Heta ke tecrîd nêwedarîyo do tu çîyêk baş nêbo."