
'Seba aye amaco yewine heskerdiş bî’

2023-02-28 14:15:59


	&nbsp;

	&nbsp;

	WAN - Roja Cinîyan ya Dinya ra ver dayîka Amara Rojbîne ke emre xo yê şenikî de dest bi têkoşînî kerd û dinyaya xo bedilnaye, qala kênaya xo kerd û da zanayîş ke heskerdiş amacê aye yê yewine bî.

	&nbsp;

	Cemîle Çîftçîya HPGyî (Amara Rojbîn) serra 2021î de Koyê Cudî yê Şirnexî de netîceyê pêrodayîşî de dinyaya xo bedilnaye û 21ê Sibate de Wan de ameye definkerdiş. Dayîka aye Devlet Çîftçîye dîyar kerd ke kênaya aye emre xo yê şenikî de her tewirê şîdetî cipersayîş kerdêne û vat ke Amara sey embaza aye bî û her tim vera zîhnîyetê serdestî de têkoşîn dayêne.&nbsp;

	&nbsp;

	Amara Rojbîn kam a?

	&nbsp;

	Amara dewa Xorutîsî ya Westanî ya Wanî de serra 1995î de ameya dinya. Keyeyo ke 5 tutê înan estbî ra yew a û keye koçkerdişê dewan vera koçê Wanî keno. Amara emre xo yê şenikîye de şîdetê dewlete şinasnena û dest bi cipersayîşî kena.

	&nbsp;

	‘Xeylê bi aqil bî’&nbsp;

	&nbsp;

	Dayîka Amra Devlet Çîftîye qisey kerd û dîyar kerd ke erdlerzê 2011î yê Wanî ra dima tepîya agêrayî dewa xo û Amara zî mecbur mende fek metkebî ra vera bida û wina vat: “Wendişî ra xeylê hes kerdêne. Waştêne biba avûkat. Tutêka bêveng û xeylê bi aqil bî. Her kar destê aye ra ameyêne. Nêwaştêne ez qet rincan biba. Şenikîtîya xo de zî teda qebul nêkerdêne. Pîyê xo reyde sey embaz bî. Tutan reyde bîyêne tutan, pîlan reyde bîyêne pîl. Xeylê ameyêne heskerdiş. Yewine waştişê aye no bî ke seba cinîyan çîyêk bikera. Embazanê xo ra zaf hes kerdêne. Embazê xo yê cinî yê dewe ra zaf hes kerdêne. Nêwaştêne cinîyî yewbînan bişiknî. Waştêne paştî bidî yewbînan.”

	&nbsp;

	Devlete da zanayîş ke serra 2012î de Amara tewrê hirê embazanê xo rojêk ke varan varayêne de şî ware ke cater arê bida û wina dewam kerd: “Roja îne bî. Werd viraşt. Dima ra saete nizdîyê 10î de bi embazanê xo reyde şî. Mi solê sporî aye rê newe girewtbî. Pîyê aye zî çaketêk aye rê girewtbî. Solê xo yê newe kerd xo pay. Mi vat do şil biba. La aye vat ez hema şina û yena. Mi aye roje ra dima aye nêdî. Kênaya mi qet rojêk zerrîya mi nêşikna.”

	&nbsp;

	‘Eşqê xozaye bî’

	&nbsp;

	Devlete sewbîna înan ard ziwan: “Xeylê xozaye ra hes kerdêne. Vilikan ra zaf hes kerdêne. Heta ke ez biba ez do mezelê aye ser de vilikan rona. Amara vatêne ez cinîya Zagrosî ya la zerrîya mi Botan de ya. Kênaya mi papikan ra zaf hes kerdêne. Ez papikanê aye sindoqî de nimnena. Amara pincar arê dabî û ma zî rotîbî. Ez pereyê aye hema zî nimnena û qet nê pereyî xerc nêkena. Keda destê kênaya mi keyeyê ma de xeylê zêde ya."

	&nbsp;

	‘Bi aşman ceneze dayî vindarnayîş’

	&nbsp;

	Devlete qiseykerdişê xo yê peyênan de vat ke kênaya aye 22ê êlula 2021î de dinyaya xo bedilnaya la xebere 5ê tebaxa 2022î de girewta û muracatê serdozgerîya komare ya Şirnexî kerda. Devlete vat: “Ma a roje ra nata prosesêk dejin cuyenî. Wexto ke ma xebere girewte ma şînê xo rona. Dima ra ma seba DNAyî gonî da. Ma çar aşman vindertî ma cenaze Şirnexî de girewt û Artemîtî de binê ablûqaya polîsan de defin kerd. Nêverdayî ke şar dekewo raşte. 12 kesî tena verdayî. Ganî no şer êdî vindero û kes nêmiro. Tu dayîkêke wa nêberma. Amara seba cinîyan têkoşîn dayene. Ez zî wazena ke cinîyê kurdî dest bidî yewbînan û têkoşîn bikerî. Gelo ma do heta kêy bindest bibî?"

	&nbsp;

	&nbsp;

	

	&nbsp;