Seba weşîya cinîyan lazimî bi konan esta 2023-02-28 11:54:17   Zelal Tunç   WAN - Fatma Arslana KHKyî ke Semsur de xizmetê weşîye dana vat ke ganî paştîdayîş daîmî bibo û ganî seba weşîya cinîyan kon bêrî awankerdiş.   Şewa 6ê Sibate de saet 04.17î de merkezê ci qezaya Bazarcixî ya Mereşî de girdîya ci 7.7 û 7.6î de di erdlerzî qewimîyayî û seba ke îqtîdar erê mudaxale kerd bilanço giran bî. Goreyê hûmaranê fermî nizdîyê 45 hezar kesî dinyaya xo bedilnayî. Herême de paştîdayîşo ke dîyeno şarî dewam keno.   Fatma Arslane ya ke bi KHKyî ameybî îxrackerdiş herêma erdlerzî de bi hawayêk zerrîwaştoxe xizmetê weşîye dana şarî.   Fatmaye derheqê prosesi de ajansê ma rê qisey kerd.   Starbîyayîş, aw û tuwalet   Fatmaye da zanayîş ke bobelat dîmenanê ke ma televîzyon û çapemenîya dîjîtale de vînenê ra giranêr o û wina vat: “Ma raşteyê xebatî de xizmetê weşîye danê. Ma dewanê Semsurî de xebetîyenê. Tabloya vernîya ma raştî zî bi xof bî. Aw, tuwalet çinî bî. Probleme starbîyayîşî zêde bî. Herême de nêweşî vejîyayî. Bi taybetî cinî û tutî taravmayêk giran cuyenî. Tutê şenikî tersenê. Kişta dayîkanê xo ra nêşinê. Tutê ke seba îmtîhanê unîversîte hadrekarî kerdêne nika fikirîyenê. Rewşêka winasî de lazimîya cinîyan yê taybetî xeylê problemin bî. Cinîyî nêeşkenê xo biresnê lazimîyanê xo yê ferzan.”    Ganî tewr zêde cinî şêrê herême   Fatmaye dewamê qiseykerdişê xo de înan vat: “Tewr zaf zerrîwazî ke şinê herême camêrdî. Coka ra cinîyî lazimîyanê xo biname bikerî, şermayenê. Ganî hûmara cinîyê zerrîwazî zêde biba. Wexto ke cinî kişta cinîyan de biba problemî yenê vatiş. Bedenê cinîyan de xeylê nêweşîyî virazîyayî. Nêweşîyê sey rayîrê îdrarî de enfeksîyon û mantar şert û mercê pakîye vera peyda bîyî. Binkincê pakî çin ê. Bi pêşnîyazê çapemenîya komelkî xeylê bajaran ra TIRê Morî kewtî têgêrayîş. Kêm bibo zî hewl danê ke lazimîyê cinîyan pê bîyarê.”   Ganî seba weşîya cinîyan konî bêrê ronayîş   Fatmaye peynîya qiseykerdişê xo de dîyar kerd ke travmayê giranî vera xeylê cinîyî vere wextê xo regl benê û hûmara cinîyêke tutê înan ver de şinê zî zêde benê. Fatmaye da zanayîş ke seba lazimîyê taybetî yê cinîyan ganî herêman de seba weşîya cinîyan konê taybetî bêrê ronayîş û bi wesîleya nê konan do cinîyî hîna san xo biresin lazimîyanê xo."