Polîsan waşt dest bidê serê pankartê TJAyî 

2023-02-25 15:25:24


	 

	AMED - Polîsan waşt dest bidê serê pankartê TJAyî yê "Dem demê jin jiyan azadîye yo", " Şînê ma sebebê têkoşînê ma yo". Parlamentera HDPyî Gulîstan Kiliç Koçyîgît, reaksîyon vera polîsan mojna û vat: “Demo ke merdimî erdlerz de merdî şima ça de bî?”

	 

	Tevgerê Cinîyan ê Azadan (TJA), bi minasebetê 8ê Adare Roja Cinîyanê Dinya bi sloganê “Paştdayîşê cinî danê ciwîyayîş” Komeleya Kultur û Hunerî yê Dîcleyî deklarasyonê xo eşkera kerd. Hewşeyê komeleyî de eşkerayîye ameye dayîş û pankartê "Dem demê jin jiyan azadîye yo" û "Şînê ma sebebê têkoşînê ma yo" ame akerdiş. Hemsereka Pêroyî ya Partîya Herêma Demokratîke (DBP) Salîha Aydenîz, parlamenterê Partîya Demokratîke ya Şaran (HDP) Gulîstan Kiliç Koçyîgît, Dîlan Dîrayet Taşdemîr, îdarekarê HDPyî yê merkez û qezayê Amedî, Komeleya Cinîyan ê Rosayî, Meclîsê Dayîkanê Aştîye, MED-DER û xeylêk cinî tewrê eşkerayîye bîbî.

	 

	Dimayê eşkerayîye polîsan wesayîtê ke pankart ci de estê awanîya DBPyî taqîb kerd. Polîsan waşt dest bidê serê pankart û filamayê TJAyî. Hemsereka Pêroyî ya DBPyî Salîha Aydenîz û parlamentera HDPyî Gulîstan Kiliç Koçyîgît reaksîyon vera polîsan mojna. Gulîstane wina reaksîyon mojna: "Demo ke merdimî binê xirbeyan de dinyaya xo bedelnayî şima ça de bî? Dewlete, polîs û leşkerî ça de bî? Hêzê şima qîmê cinîyan nêkeno? Şima dest dayî serê pankartî, dewleta şima na ya?”

	 

	Dima ra polîsan dîmen û fotografê pankartan ant û şî.