OHDyê Dîlokî derheqê îşkenceyê zîndanan de gerre kerd 

2023-02-24 15:47:01


	 

	 

	DÎLOK - Avûkatanê OHDyê Dîlokî, derheqê îşkenceyê dozgerîye gerreyê îdarekarê zîndanî kerdî.

	 

	Zîndanê qezaya Islahîye yê Dîlokî yê Tîpê Tyî de 21ê Sibate de gardîyanan hêrişê tepişteyanê sîyasî kerd. Gardiyanê ke seba hûmartişî şî qawîşê C-23ine, 6 tepişteyanê sîyasî ra vatî, "ma rê rêzdar bê" û hêrişê înan kerdê. Xeylêk gardîyanan, pey ra destê tepişteyan girêdayî û înan korîdor de serfekî derg kerdî. Ame dîyarkerdiş ke demê îşkenceyî de gonî fekê tepişteyan ra ameya. Ame eşkerakerdiş ke dima ra mudûrê zîndanî ameyo cayê hedîse û tepişteyan ra vato, gardîyanî newe yê, "seba ke şima nas nêkerdê, metodêk wina kerdê."

	 

	Heyetêk avûkatanê OHDyî yê Dîlokî vizêr bi tepişteyan reyde pêvînayîş kerd. Avûkatanê OHDyî da zanayîş ke tepişteyan rê îşkence ameyo kerdiş û derheqê îşkenceyê ameyo kerdiş de dozgerî de gerreyê îdarekarê zîndanî kerdî.