'Bi îlankerkişê OHALî koçberî bîyî hedef' 

2023-02-22 11:35:36


	 

	 

	Elfazi Toral 

	 

	WAN - Endama Heyetê Rayîrberîya SERHAT GOÇ-DERî Ayten Kirane da zanayîş ke sebebê îlankerdişê OHALî hedefgirewtişê paştîdayîş û koçberan o û na rewşe rê reaksîyon mojnaye.

	 

	6ê Sibate de merkezê ci qezaya Bazarcixî ya Mereşî de bi girdîya 7.8 erdlerz pê ame û no erdlerz 11 bajaran ser de tesîr viraşt. Her ke şino bîlançoya erdlerzî zêdîyena. Bi îlankerdişê OHALî îqtîdarê AKP-MHPyî tesîrêk xirab koçber û mexdurê erdlerzî ser de viraşt. Endama Heyetê Rayîrberîya SERHAT GOÇ-DERî Ayten Kirane da zanayîş ke sebebê îlankerdişê OHALî hedefgirewtişê paştîdayîş û koçberan o û reaksîyon mojnaye rewşa OHALî ser.

	 

	'Bi îlankerdişê OHALî paştîdayîş û koçberî bîyî hedef'

	 

	Aytene dîyar kerd ke amacê OHALî vernîgirewtişê paştîdayîşan o û wina dewam kerd: “Sebebê OHALî no yo ke kurdî bi rihê paştîdayîşî herême de têgêrenî. Wazenê ke komel bigecilnî û bikerî binê kontrolê xo. Komelo rêxistinkerde  komelo ke ci perseno nêwazenê. Bi aşman verê cû merdime zanistî vatêne do erdlerz pê bêro. La tu tedrîbî nêameyî girewtiş. Îqtîdar derheqê na babete de tu çîyêk nêkerd. Ganî sere de selahîyetdarê îqtîdarî biameyêne cayê erdlerzî. Îqtîdarî ra ver şar seba paştîdayîşî şî. Îqtîdar wexto ke dî şar bi paştîdayîşî birînanê xo pişneno OHAL îlan kerd.”

	 

	'Bi OHALî nêeşkeno vernîya dizî û bêusûlîyan bigêro’

	 

	Aytene vat ke îqtîdar seba ke sucê xo binimino OHALî îlan kerd û wina domna: “Îqtîdar wazeno bi rayîrê OHALî kêmanîyanê xo û dizîyan binimino. La se bikerê wa bikerê şar ferqê nê çîyî de yo. Ê vanê qey do leşker û polîsan verdê serê sereyê şarî û do her çî safî bibo la wina nîya. Ganî goreyê raybazanê huqûqî rewşa sey dizî û ya sey ci bêrî çareserkerdiş. Bi OHALî, polîtîkayê zext û şîdetî dizî û bêusûlîyî nînê çareserkerdiş.”

	 

	'Ma bi polîtîkayanê winasîyan yê vera koçberan qebul nêkenê’

	 

	Aytene tewr peynî da zanayîş ke koçberî nê erdlerzî de sey hedef ameyî mojnayîş û vat: “Heqê koçberan zî esto ke sey şaranê tîya bêrî pawitiş, xelisnayîş û lazimîyê înan bêrî caardiş. Eke nê welatî bêrî qebulkerdiş ganî heqê înan zî bêrî qebulkerdiş. Xirban de zî ciyayî hemverê înan de kewto dewre. Ma bi polîtîkayanê winasîyan yê hemverê koçberan qebul nêkenê.”