Seba tutan ganî cayêk bi asayîş bêro hadrekerdiş  

2023-02-18 10:12:08


	 

	 

	Melîke Aydin

	 

	ÎZMÎR - Psîkolog Pinar Akdenîze da zanayîş ke erdlerzî vera seba weşîya tutan ganî şertê cuyêka bi asayîş bêro hadrekerdiş û xebata psîko-komelî ya demderge ke tede STK û rêxistinê meslekî estê pê bêra.

	 

	Badê di erdlerzan ke merkezê înan Mereş bî, 10 bajaran de rijîyayîşê girdî pê ameyî û xebatan wedarnayîşê xirban dewam kena.

	Qet şik çino ke yê ke tewr zêde erdlerzî ra tesîr bîyî cinî û tutî yê. Endama Komeleya Şêwirmendîya Psîkolojîke ya Tirke Psîkolog Pinar Akdenîze derheqê şêwirmendîya tutan û ciwanan de qisey kerd.

	 

	Pinare da zanayîş ke çîyo tewr muhîm ke ganî seba tutan bêro kerdiş, awankerdişê cayêk asayîş o û wina vat: "Tay tutî nêwazenê şêrê bajaranê bînan. Bajarê ke şinê ra zî bawer nêkenê. Tersê vînîbîyayîşê keye, embaz û mekteban esto. Coka ra zî xo aîdê nê herêman hîs nêkenê. Coka ra wezîfe keweno milê ma ser. Ganî bi koordinasyon xebatêk bêra kerdiş. Ganî tutî xizmetê perwerde û wesîye ra fêdê bigêrê. Ganî xo bi keyeyanê xo reyde asayîş hîs bikerê."

	 

	'Ganî tora paştîdayîşî bêra hîrakerdiş'

	 

	Pinare dîyar kerd ke ganî tutanê herêma qewimîyayîşî û tutanê ke herême ra vejîyayî û şîyî bajaranê bînan reyde xebata psîko-komelî bêra kerdiş û hedîseyê travmatîkî yê komelkî yê verênan de zî Stenbol, Anqara, Îzmîr û Amedî de torê paştîdayîşî awan kerdî. Pinare wina dewam kerd: "Na tore de Yewîya Tabîbanê Tirkan (TTB), Komeleya Psîkîyatrî, Komeleya Psîkologanê Tirkan, Komeleya Pisporê Xizmeta Komelî, Komeleya Vernîgirewtişê Îstîsmarkerdişê Tutan tede bê. Ganî nê prosesî de tora paştîdayîşî bêra girdkerdiş. Ganî baro, komeleya paştîdayîşê psîkolojîk tede ca bigêra. Ganî STK, psîkolog, şêwirmendê psîkolojîk tewr bibî. Lazimî bi rêxistin û Dezgehanê Komelê Sivîlî (STK) esta. Ganî rêxistinê meslekî zî protokolan hadre bikerê. Wexto ke tora xo hîra bikerê ganî protokolê fermî bêro hadrekerdiş."