Rojnamegerê tepişteyî: Ganî xeberdarîya ke feydeyê komel ya bêra kerdiş  

2023-02-13 15:13:44


	 

	 

	ANQARA - Rojnamegerê tepişteyî yê serê felaketê erdlerzî de mesajê xo şawitî wina vatî: “No felaket nîyo, qirkerdiş o. Ma venga meslegdaranê xo kenê ganî xeberanê ke feydeyê komelî de yê bêrê viraştiş.”

	 

	9 xebatkarê JINNEWSî û Ajansê Mezopotamyayî 29ê Teşrîna Verêne ra Zîndanê Sîncanî de yenê tepiştiş, derheqê erdlerzê ke merkezê ci Mereş bi, mesaj şirawitî.

	 

	Rojnamegeran nê erdlerzî sey qirkerdişêk biname kerdî û venga meslegdaranê xo yê wareyan kerdî.

	 

	Mesajê rojnamegeran wina yo:

	 

	"Ma sere de sersaxî şarî ra wazenê. Roja ewilî yê erdlerzî de ma televîzyon û rojnameyan de çîyê ke yenê ciwîyayîş, taqîb kenê. No tabloyê bîyaye mojneno ma ke no felaket nîyo, qirkerdiş o. Seba paştdayîşî ma hetkarî organîze kerd. Ma zî roja ewilî de hem dej û hem zî hêrsê nê erdlerzî ciwîyenê. Ma bi tepişteyanê bînan yê zîndanî waşt seba paştdayîşî hetkarî bikerê la no çî hetê îdarekarîya zîndanî ra yeno astengkerdiş. Labelê israrê ma no astengî derbaz kerd. Meslegdarê ma yê wareyan de zî ameyî astengkerdiş, ma nê çî şermezar kenê. Ma venga meslegdarê xo kenê ke ganî xeberê ke feydeyê înan komelî rê yeno, bêrê viraştiş. Ma tîya hîsê xo yê paştdayîşî neql kenê.”