Bêrecûkê Rihayî de welatijî paweyê paştdayîşî yê  

2023-02-09 09:54:41


	 

	RIHA - Qezaya Bêrecûkî ya Rihayî de Raşteyê Nêweşxaneyê kanî de xebatê xelisnayîşê binê xirban de dewam kenê. Welatijan dîyar kerd ke ê nêeşkenê bikewê zerreyê keyeyê xo la hetê AFADî ra tu çadirî nêameyê akerdiş.

	 

	Qezaya Bazarcixê Mereşî û Dîlok ke merkezê erdlerzî yo, reya ewil bi girdîyê 7.7 û reya diyîn zî bi girdîyê 7.6 erd lerza. Mereş zî mîyan de erdlerzî tesîrê xo serê 11 bajaran de kerd. Her saetê ke şinê  bilançoyê merdeyan tewr zêde beno. Riha de heta nika tewr tay 127 kesî dinyaya xo bedelnayî û 2552 kesî zî birîndar ê. Qezaya Bêrecûkî ya Rihayî de zî Raşteyê Nêweşxaneyê kanî de xebatê xelisnayîşî dewam kenê. Kêmîyê xelisnayîşê ekîbê xelisnayîşî balkêş bi. 

	 

	Ame zanayîş ke qeza de heta nika 21 kesî dinyaya xo bedelnayî. Welatijê ke qisey kerdî û vatî, ê nêeşkenê bikewê zerreyê keyeyê xo hetê AFADî ra tu çadirî nêameyê akerdiş. Welatijî kêmîyê hetkarîyan ra bi reaksîyon ê û venga paştdayîşî kenê.

	 

	'Tu hetkarîyêk nêresa'

	 

	Hatîce Timuçîna (53) ke 3 merdimê aye binê enkazî de yî wina vat: "Di merdimê mi binê enkazî ra ameyî xelisnayîş. La hema xeylê kesî binê enkazî de paweyê xelisnayîşîyî. Ma zî kişta awanîyanê rijyayeyan de paweyê xelisnayîşê înan ê. Destê ma ra çîyêk nîno. Tu kesêk mi çin o û nika tersê erdlerzî vera ma nêeşkenê şêrê keyeyê xo. Ma raşte û kuçeyan de pê îmkananê xo hewl danî bimanê. Ma adir tafînenê û xo germ kenê. Ya zî park û wesayîtan de manenê. Tu hetkarî nêresa ma. Ma paweyê hetkarîye yê." 

	 

	'Heta nika çadirî nêameyî akerdiş'

	 

	Cemîle Yîgîta 70 serrî ke merdimê aye binê enkazî de yê da zanayîş ke binê enkazî ra vengê hemwelatijan nîno eşnawitiş û wina vat: "Keyeyê mi ra di tenan vetî tena kesêk binê enkazî de yo. Şar perîşan o. Ma tersenê ke bikewê keyeyê xo. Tîya de çadirî çin ê. Ma teber de yê. Heta nika çadirî nêameyî akerdiş. Kesêk hetkarî nêdano. Eke çadirî biameyêne akerdiş do tay bo zî seba ma baş bibayêne. Lazimîya ma cayanê daîmîyan esta."