Do Îzmîr ra ver bi Gemlikî rayîr ra şîyayîş bêro kerdiş 

2023-02-01 15:30:19


	 

	 

	ÎZMÎR - Hemverê tecrîdê serê Rayberê PKKyî Abdullah Ocalanî do 14ê sibate de Îzmîr ra ver bi Gemlîkî ra rayîrraşîyayîşêk bêro kerdiş, seba rayîr ra şîyayîşî venga tewrbîyayîşî ame kerdiş.

	 

	Partî û sazgehê kurdî do derheqê Komploya Mîyannetewî ya 15ê Sibate ya hemverê Rayberê PKKyî Abdullah Ocalanî bi sloganê, “seba çareserî ma ver bi Îmraliyî şêrê” do 6ê sibate de qezaya Qoserê Mêrdînî û qezaya Geverê Colemêrgî de ver bi Gemlîkî de rayîrşîyayîşêk organîze bikerê.

	 

	Îzmîr de zî Kongreya Demokratîke ya Şaran (HDK), Tevgerê Cinîyan ê Azadan (TJA), Partîya Demokratîke ya Şaran (HDP), Partîya Herêmê Demokratîk (DBP), Komeleya Hetkarî û Paştdayîşî yê Bi Keyeyê Tepişteyan û Hukmwerdoxê Egeyî (EGE TUHAYDER) paştdayîş da nê rayîr ra şîyayîşî. Derheqê babete de awanîya HDPyî ya Îzmîrî de kombîyayîşê çapemenîye ame organîzekerdiş. Eywana ke kombîyayîş ame kerdiş, pankartê “Seba tecrîd peynî bibo, ma edalet wazenê. Seba çareserîyêk  demokratîk ma ver bi Îmraliyî şinê.

	 

	Hemsereka Ege TUHAY-DERî Nilay Guleser dîyar kerd ke Zîndanê Îmraliyî de huqûq, qanûn, makeqanûn û qeydeyê unîversalî ameyê vindarnayîş. Nilay, ard ziwan ke tecrîdê Îmraliyî bêhuqûqî, bêexlaqî û bêwijdanî yo û wina vat: “No bêhiqûqî û bêedaletî tena seba Birêz Ocalanî seba komelê zî tehlukeyêk pîl o. Sîstemê tecrîdî yê ke tesîr her wareyê komelî keno, çareserîya demokratîk û aştiyane yê problemê kurdî hedef gêno û amanc keno ke Tirkîya mehkumî tarîtî bikero.”

	 

	Nîlaye, ard ziwan ke polîtîkayê tecrîdkerdişî qebûl nêkenê, heta polîtîkayê tecrîdî, şer û pêrodayîşî peynî nêbê, do têkoşînê xo dewam bikerê û wina vat: “Ma venga heme beşê komelî kenê ke mabêne 6 û 15ê Sibate de hemverê tecrîd û polîtîkayê şerî pîya têkoşîn bikerê û polîtîkayê tecrîdî bişikinê û ver bi aştî û azadî şêrê. Na çarçewa de ma do 14ê sibate roja Sêşemê saete 12.00ine de verê Edliyeyê Bayrakli yê Îzmîrî eşkerayîye bidê û 15ê sibate roja Çarşeme Stenbol ra ver bi Gemlikî rayîr ra şêrê. Ma pêro rayaumumî yê demokratîke û şarê xo dawetê eşkerayî û rayîr ra şîyayîşî ke ma organîze kenê.”