
Bi bîsîkletê xo 5 welatan derbaz kerd: Ganî sînorî çinbê 

2023-01-19 10:44:03


	&nbsp;

	&nbsp;

	Melîke Aydin

	&nbsp;

	ÎZMÎR - Aktîvîst Laura Sennhausera ke 6 aşmî verê cû pê bîsîkletê xo vejîyaye rayîr nika Tirkîya de ya û da zanayîş ke rayîr de xeylê astengîyan reyde rî bi rî menda. Laura da zanayîş ke ganî cinîyê dinyaye paştî bidî yewbînan û vat ke dingê aye yê tîya rap ê Başurê Amerîka yo.

	&nbsp;

	Aktîvîst Laura Sennahauser aşma Tebaxe ya 2022î de dest bi turê xo yê bîsîkletî kerda. Lauraye Almanya de sey psîkologe xebetîyena. Lauraye pê bîsîkletê xo vejîyaye turê dinya û vat ke heta nikap ê bîsîkletê xo 5 welata gêraya.

	&nbsp;

	Lauraye destpêkê gêrayîşê xo ra heta nika şîya Montenegro (Karabag), di reyan Arnavut, Vakurê Makedonya, demêk kilm Yewnanistan û tewr zî ameya Tirkîya. Badê Tirkîya do şêra Başurê Amerîkaye.&nbsp;

	&nbsp;

	‘Mecbura cayanê bi asayîşî vîna’&nbsp;

	&nbsp;

	Lauraye tena gêrena û ge-ge embazê aye şinê zîyaretê aye. Lauraye dîyar kerd ke Ewropa de zêde problemêk nêcuyena û vat: “Xeylê reyan persê sey ‘ti eşkena tena şêra, ti nêtersena’ kenî. Ez tenabîyayîşî ra nêtersena. La bêşik seba ke ez cinî ya xeylê reyan zehmetîyan ancena. Ez xozaye de kamp kena. Seba ke ez cinî ya mecbura hîna bi asayîş têbigêra.”

	&nbsp;

	‘Welato tewr balkêş Tirkîya ya’

	&nbsp;

	Lauraye vat ke welato ke goreyê xo wayîrê taybetmendîyan o û wina dewam kerd: “Arnavutluk seba mi cîya bî. Merdimê Arnavutlukî xeylê cîya yî. Meymanperwer î. Mi tecrubeyanê başan cuyaye. Welato tewr balkêş zî Tirkîya bî. Sînoran ra derbazbîyayîş zaf cîya bî. Mi hîs kerd ke ez derbazê Asyaye bîya. 3 hewteyo ke ez tîya de ya. Îpsala, Luleburgaz, Tekîrdag, Ayvalik û Kuçukuyu gêrena. Şertanê normalan de kafeyan de cinî û camêrdî pîya ronişenî. La kahweyan de tena camêrdî ronişenî. Cinî çinî yî. Îzmîr bajarêk gird o la ewja zî wina yo.”&nbsp;

	&nbsp;

	‘Merdimî sînor ronayî’&nbsp;

	&nbsp;

	Lauraye qiseykerdişê xo yê peyênan de bale ant sînoran ser û wina qedênaye: “Merdimî sînor xêz kerdî. Sînor formalite yî. Sînorê mi çinî yî. Welat bedelîyeno la hîsîyat her tim sey yewbînan o. Sînor çinîbîyayêne acaba do se bibayêne? La do nîjadperestî bibayêne. No gêrayîş xeylê mi bedelna. Xobawerkerdiş de mi xeylê çî qezenc kerd. Mi bawerî û kulturê cîyayan şinasna. Babeta cinîye zî xeylê muhîm a. Ganî heme cinîyê dinya paştî bidî yewbînan.”

	&nbsp;