‘Yewin aktoro ke şer biqedêno Birêz Abdullah Ocalan o’ 

2023-01-17 15:49:21


	 

	ANQARA - Çalakîya Nobeta Edaletî ya wekîlanê HDPyî vera tecrîdkerdişê Rayberê PKKyî Abdullah Ocalanî roja 19ine de dewam kena.

	 

	Çalakîya Nobeta Edaletî ya wekîlanê HDPyî vera tecrîdkerdişê Rayberê PKKyî Abdullah Ocalanî Berê Dîkmenî yê Meclîsî de roja 19ine de dewam kena. Wekîlî Kemal Bûlbûl, Omer Ocalan, Zeynel Ozen, Feleknas Uca, Gulîstan Kiliç Koçyîgît, Zuleyha Gulum, Kemal Pekoz, Huseyîn Kaçmaz û Ridvan Turan beşdarê nobete bîyî.

	 

	Zeynel Ozenî tîya de eşkerayîye da û wina vat:

	 

	“Tecrîdê Îmraliyî dişmenîya vera kurdan virazeno û ganî Abdullah Ocalan bieşko keye û avûkatanê xo bivîno. Tek aktoro ke eşkeno nê şerî biqedîno Birêz Ocalan o. Îqtîdar zî ney ra ey asteng keno. Vera partîya ma operasyonî yenê kerdene. Ganî muxalefet vera nê kerdişan û reşkerdişê serê HDPyî vejîyo. HDP hêzê şarî yo.

	 

	Îradeyê Şarê Kurdî yeno peygoşkerdene, heme şaredarîyanê ma de qeyûm yeno tayînkerdiş, her roje operasyonî pê yenê. Bi hezaran merdimê ma zîndanan de yê, eynî wextî de seba  ke zîndanê qanûnê vera-kurdîtî yeno kerdiş, her roje cenaze yenê. Prosesê ke ma ci de yê, girîng o. vernîya ma de weçînayîşêk esto. Wina aseno ke weçînayîş do binê şert û mercê îstîsnayî de bêro kerdiş û îmkanê kerdişê mîyanê şert û mercê demokratîk de zaf kêmî yo. Ganî heme mûxalefet vera nê caardişê vera-demokratîk, bi taybetî zî krîmînalîzekerdiş û bêbandorkerdişê HDPyî ra vajê nê. Seke şima zî zanê şarê ma bi serran o mîyanê şerî de ciwîyeno la şarê ma tu wext sere nêtewêna.

	 

	Ma do têkoşînê xo yê seba awankerdişê komara demokratîke ya Tirkîya berz bikerê, ma do qetî sereyê xo nêarê war. Ma do xîretanê înan, pêro kayanê înan pûç bikerê. Xoverdayîş ciwîyayîş o, xoverdayîş serkewtiş o. Ma do qetî ser bikewê.”