HDP: Ganî vengê Abdullah Ocalanî bêro eşnawitiş 

2023-01-12 15:26:13


	 

	 

	ANQARA - Wekîlanê HDPyî Nobeta Edaletî yê vera tecrîdî de vat: ''Ganî cade vengê Abdullah Ocalanî bêro eşnawitene. Heta ke no veng nêro her kuçe û warî de çalakîyê ma do dewam bikerê.''

	 

	Wekîlê HDPyî roja 16ine de vera tecrîdê serê Rayberê PKKyî Abdullah Ocalanî Nobeta Edaletî rê dewam kenê. Wekîlî Kemal Pekoz, Siddik Taş, Erol Katircioglu, Remzîye Tosun, Nurane Îmîr, Garo Paylan, Huseyîn Kaçmaz û Erdal Aydemîr ver bi Berê Dîkmenî yê Meclîsî şîyî.

	 

	Wekîle Remzîye Tosun nameyê wekîlan ser o eşkerayîye daye û vat: ''Heta ke tecrîd bêro wedaritene ma do Nobeta Edaletî rê dewam bikerê. Îqtîdarê AKP-MHPyî keno ke pê rayîrê tecrîdî sîyasetî dîzayn bikero. Ganî berê Îmraliyî bêrê akerdene û derheqê weşîya Ocalanî de agahîyî bêrê dayene rayaumûmîye. Ganî cade vengê Abdullah Ocalanî bêro eşnawitene. Heta ke no veng nêro her kuçe û warî de çalakîyê ma do dewam bikerê. Ganî Wezîrîya Edaletî seba wedaritişê tecrîdî cade têbigêra.''

	 

	Remzîye dîyar kerd ke bi çalakîyanê xo hewl danê waştişê selahîyetdarî bîyarê ziwan û wina qedêna: “Ganî Wezaretê Edaletî bikewo mîyanê liv û tevgerî û rayîr abikero ke keye û avûkatî bieşkê şêrê Îmraliyî. Heta ke no bi ca yeno zî do çalakîyê ma yê her ware, kuçeyî û meydanan dewam bikerê. Seba ke êdî na herre gonî û qirkerdişan rê mird bî. Ganî demêk vernîya demêk agahî birêz Ocalanî ra bêrê girewtiş.”