Keyeyê Şenyaşarî: Ma do 17ê Çeleyî de Meletî de bê 

2023-01-12 14:35:52


	 

	 

	RIHA - Keyeyê Şenyaşarî dîyar kerd ke ê bi pawitoxê heqê merdiman reyde 17ê çeleyî roniştişê ewilî yê dewaya qirkerdişê nêweşxaneyî de Meletî de bê.

	 

	Merdim û pawitoxê Parlamenterê AKPyî Îbrahîm Halîl Yildiz 14ê hezîrana serra 2018ine de hêrişê dikanê keyeyê Şenyaşarî yê Pirsûsî yê Rihayî kerd. Netîceyê hêrişî de mêrde û 2 lajê dayîka Emîne Şenyaşare ameyî qetilkerdiş. Emîne Şenyaşar û lajê ci Ferît Şenyaşar ke qirkerdiş ra bi birîndarî xelisyabî, 9ê Adara 2021ine de vernîya Edliyeyê Rihayî de dest bi Nobeta Edaletî kerdî. Çalakîya keyeyî roja 675ine de dewam kena. Emîne Şenyaşare seba ke nêweşe bîye, ewro nêameye cayê çalakîye û nobeta ewro hetê  Ferît Şenyaşarî ra ameye girewtiş.

	 

	'Ma do 17ê çeleyî de Meletî de bê’

	 

	Keyeyî ewro serê hesabê xo yê Twitterî de nê mesajî vila kerd: “Heta ke tedayê sîyasî serê dozgerî û dadgeran nêwurzo, do hizûr nêro welat! TBB û heme baroyî wayîrê waştişê ma yê edaletî vejîyayî. Ma do 17ê çeleyî de bi hezaran pawitoxê heqê merdiman reyde Meletî de bê. Ma do xo qet bêhêvî nêkerê, se beno wa bibo ma do peynîya peynî biresê edalet.”