‘Ma paweyê muhakemeyêkê adilane yê’ 

2023-01-11 15:17:29


	 

	RIHA - Çalakiya "Nobeta Edaletê" ya Keyeyê Şenyaşarî 674 rojî yo dewam kena û keyeyî bale ant serê dewaya hêrişê nêweşxaneyê ke do 17ê çele de bêro organîzekerdiş û ê  paweyê muhakemekerdişêk adilane yê. 

	 

	Merdim û pawitoxê Parlamenterê AKPyî Îbrahîm Halîl Yildiz 14ê hezîrana serra 2018ine de hêrişê dikanê keyeyê Şenyaşarî yê Pirsûsî yê Rihayî kerd. Netîceyê hêrişî de mêrde û 2 lajê dayîka Emîne Şenyaşare ameyî qetilkerdiş. Emîne Şenyaşar û lajê ci Ferît Şenyaşar ke qirkerdiş ra bi birîndarî xelisyabî, 9ê Adara 2021ine de vernîya Edliyeyê Rihayî de dest bi Nobeta Edaletî kerdî. Çalakîya keyeyî roja 674ine de dewam kena. Seba ke peynîya hewteyî de berê edlîyeyî padeye yo, keyeyî çalakî keyeyê xo yê Pirsûsî de dewam kerd.

	 

	Ferît Şenyaşarî nobete de qisey kerd û dîyar kerd ke pêwa heme astengî û zulmê serê înan de zî çalakîya înan roja 674ine de dewam kena û vat: “Eke cigêrayîşê edaletî suc bo, ma vanê ma zî destbend bikerê û bitepişnê.”

	 

	Ferîtî ard vîr ke roniştişê ewilî yê dewaya hêrişê nêweşxaneyî do 17ê çele de Dadgeha Meletî de bêro kerdiş û wina vat: “Yê ke qetlîam pê ardî, parlamenterê partîya îqtidarî û merdimê ci yê. Eke her çiqas dîmenê kameraya nêweşxaneyî werte ra amebî wedaritiş zî la her kes baş zano ke dîmen arşîvê kameraya asayîşê nêweşxaneyî de estê. Îfadeyê şahidê nêweşxaneyî û midûrê emniyetî esto. Îfadeyê xebatkarê weşîye û doktoran esto. Parlamenter Îbrahîm Yildizî û keyeyê xo îfadeyê xo de vanê ke qetlîamêk senîn kerdê. Nê wextê nobeta ma de çi rêxistinê huqûqî û heq, çi zî baro paştdayîşêk bêdawî pêşkêşê ma kerdî. Dimayê rayaumumî virazya, dewa ame akerdiş. Ma wazenê dewa ke do 17ê çeleyî de bêro kerdiş, muhakemeyêk adil pê bêro û qerarêk wîjdanê komelî rehet bikero, bêro dayîş.”