‘Cinî pîya xurt ê do şîdet teşhîr bikerê’ 

2023-01-07 11:11:07


	 

	 

	 

	ÎZMÎR - Cinî Pîya Xurt ê ra Dîdar Gule dîyar kerd ke do şîdetê camêrd û şîdetê dewlete camêrdî ya ke raşteyan de şîdet meşru keno, teşhîr bikerê.

	 

	Roniştişê dewaya hêrişo ke Îzmîr de hemverê awanîya Partîya Demokratîke ya Şaran (HDP) de ame kerdiş û Denîz Poyraza ke hêriş de ameye qetilkerdiş û kerdox Onur Gencero ke ameyê ke muhakemekerdiş 27ê Kanûna 2022î de ame dîyîş. Cinî Pîya Xurt ê (KBG) ya Îzmîrî seba ke qeraro ke derheqê kerdoxî de ameyo dayîş protesto bikerê û kerdoxanê bînan teşhîr bikerê çalakî pê ardî û çalakîye de polîsan astengîyan vetbî, hewl dabî ke cinîyan destbend bikerê. Badê çalakîye Dîdar Gule bi îşkence ameye destbendkerdiş. Dîdare badê îfadeyî serbest ameye veradayîş.

	 

	Dîdare derheqê babete de ajansê ma rê qisey kerd. Dîdare qiseykerdişê xo de vat ke sey Cinî Pîya Xurt ê hemverê şîdetê camêrdî de her tim yenê têkişt û wina vat: “Yew tewirê şîdetî çinî yo. Cuya cinîyan, LGBTÎ bi şîdetî ameyî piştiş. Ma cinî hemverê her tewirê şîdetî de têkoşîn danê. Ma Cinî Pîya Xurt ê hem hemverê şîdetê camêrdî û hem zî hemverê şîdetê dewlet camêrdî de têkoşîn kenê. Hemverê têgêrayîşê cinîyanê Kurdan de cinîyan destbend kenê û tepişenê. Rojnamegerê cinî yenê destbendkerdiş û tepiştiş. Ma dî ke Denîz Poyraze ameye qetilkerdiş. Kiştoxî erşawitî awanîya HDPyî û uca de Denîze qetil kerd. La kiştox netîceyê psîkopatîye de nêşî uca. Plankerde virazîya.”

	 

	

	‘Teşhîrkerdişê şîdetî muhîm o’

	 

	Dîdare dîyar kerd ke prosesê dewaya Denîz Poyraz de dadgehe rastî nimita û wina dîyar kerd: “Seba nê ma waşt ma çalakîyêke pê bîyarê. Ma şîdetê camêrdî uca de baş dî. Teşhîrkerdişê nê zî tehemulê înan dano zor û bi şîdet hêriş kenê. Ma dimayê dadgehe waşt vejîyê kuçeyan û vengê Denîze bidê eşnawitiş. Vernê de ma kerdî binê ablûqa, wesayîtê destbendkerdişî ardî. Dima ra ber akerdî û fek vera dayî. Înan bi nê mesajêk da ma û vatî ma do şima yew bi yew bitepişê. Ma zî vat, ma tîya yê û ma bêveng nêmanenê. Seba nê zî ma vanê teşhîrkerdişê şîdetî xeylêk muhîm o.”

	 

	‘Ma vat berpirsîyar şima yê’

	 

	Dîdare dîyar kerd çalakîye de vatê ke nê qirkerdişî de Wezaretê Karê Zereyî berpirsîyar o û wina vat: “Nê ser de polîsan astengî vet. Ça de desteştiş û kiştişêk cinî bibo, fotografê şikdarî bi wezîrê karê zereyî reyde vejêno werte. Tîya de rêxistinbîyayîşêkê sucî esto. Ma vat ganî nê qirkerdişî de zî berpîrsîyarîyê wezaretê karê zereyî esto. Denîze cinîyêke Kurde ya hemverê şîdetê dewleta camêrdî de têkoşîn kerdêne. Denîze embaza ma ya têkoşînî bî. Seba nê qetilkerdişê Denîze cayêk muhîm de ca gêna. Ma nêtersenê, ma bêveng nêmanenê û sere nêtewênenê. Ma do bi no hawa her tim kuçeyan de bê.”