Hemsereka GOÇÎZDERî: Têkoşînê ma do dewam bikero 

2023-01-04 13:19:16


	 

	 

	STENBOL – Hemsereka GOÇÎZDERî Kamîle Kandala ke faalîyetê komeleye ra ameye tepiştiş û 6 aşmî ra dima serbest ameye verdayîş dîyar kerd ke têkoşînê înan bi sloganê ‘Jin Jiyan Azadî’ dewam bikero.

	 

	3ê Hezîrana 2022î de 22 endamê Komelye Taqîpkerdişê Koçberan (GOÇÎZDER) ameyî destbendkerdiş û 11 hezîrane de înan ra 16 kesî ameyî tepiştiş. Yewine roniştişê dewaye 13ê kanûna 2022î de ameye dîyîş. Hemsereka komelye Kamîle Kandale zî tede 4 kesî roniştişê yewine de ameyî tehlîyekerdiş. Kamîle Kandale derheqê roniştişo ke do 4-5ê Çeleyî de bêro dîyîş û dewaya girewtişê komeleye de qisey kerd.

	 

	Kamîleye da zanayîş ke ê bawerê ke embazê înan yê bînî serebst bêrî verdayîş û wina dewam kerd: “Ma bawerîya xo qet vînî nêkerd. Çimkî ê îdîaname bi zorî hadre kerdî. GOÇÎZDERî raşteyê koçberîye û koçkerdişî de cigêrayîşê hîrayan kerdêne. Raporê ma, xebatê ma sûc ameyî hesibnayîş. Ma bi hawayêk zelal xebata komelo sivîlî rayra benî. Ma derheqê koçkerdişê serranê 90, 2015-2016î de xebatan kerd. Ma mehkema de zî înan ard ziwan. Çîyê ke raporanê ma de yenê nuştiş nê yî.”

	 

	‘Rêxistina komelî vengê cinîye yo’

	 

	Kamîleye dîyar kerd ke heme kes dî ke şar senî şerê Sûrîye, Afganistan û Ukrayna-Rûsyaye ra remeno û wina dewam kerd: “Vatişê nê çîyan senî sûc beno acaba. Vanê şima pereyê ke seba projeyan dîyayî dayî kam ca. Lê pereyê ke vanî wina pereyê girdi nîyî. Eke şima werte de sûcêk bigêrî ganî şima bahaneyanê başan zî bivînî. Rêxistina komelî vengê komelî ya, vengê cinîyan a

	 

	‘Çîyo ke vera têkoşînî de bêro dayîş ceza yo?’

	 

	Kamîleye ard ziwan ke bi serran o zîndanan de binpaykerdişî dewam kenî la serranê peyênan cîya bîyo û vat: “Acaba çîyo ke vera têkoşînê heq, cinî, şoriş û merdimîye de bêro dayîş ceza yo? Nê ceza nîyo. Prosesê peyênan de raybazê newe kerdî dewre. Netîceyê nê qeraran de tepişteyê sîyasîyan ser de tay çîyî yenê ferzkerdiş. La hemverê nê caardişan de ganî vindetişêk bi qerardar bêro dayîş. Wexto ke hîssê edaletî çinî bo merdim nêeşkeno hetê komelî de xo dewam bikero. Ganî bala dewlet û partîyê sîyasî komelê sivîlî de bo. Ganî cuyêka seyyewbînan û azade bêro awankerdiş.”

	 

	‘Ma seba cinîyan têkoşîn danî’

	 

	Kamîleye da zanayîş ke têkoşînê cinîyan zindan û her ca de yo û wina vat: “Ma seba cinîyan têkoşîn rayra berd û ma dewam kenî. Ma hem seba cinîyanê koçberan, hem seba cinîyanê kurdan, hem seba cinîyanê Îranî û hem zî seba cinîyanê Elewî û Tirkî têkoşîn da. Ma do paştîdayîş û paştîya xo seba heme cinîyanê dinya dewam kenî. Herinda tepiştişê GOÇÎZDERî ganî komeleyê sivîlî zêde bibî. Ganî rêxistinê komelo sivîlî asan bêrî verdayîş, dest hedefgirewtişî ra vera bidî.”

	 

	Kamîleye wina qiseykerdişê xo qedênaye: “Ez seba roniştişê diyîne û dewaya tepiştişî vengê paştîdayîşî dana her kesî. Eke rêxistinê komelê sivîlî û dezgehî pîya mîyanê paştîdayîşî de bî û ganî vengê ma hîna zêde bivejîyo. Do patîdayîşê ma hîna gird bibo. Tede 25 kedkarê çapemenîye zî estî, ganî heme tepişteyî bilez serbest bêrî verdayîş. Têkoşînê ma do bi sloganê ‘Jin Jiyan Azadî’ dewam keno.”