Keyeyê Şenyaşarî: Wa serra 2023 biba serra edaletî

2022-12-31 14:35:48


	 

	 

	RIHA - Çalakîya "Nobeta Edaletî" ya Keyeyê Şenyaşarî 663 rojî yo dewam kena. Keyeyî roja peynîya serre de nê mesajî da: “Serra 2023ine biba serra edaletî û wa birînê ke gonî benê, do bêrê dermankerdiş.”

	 

	Qezaya Pirsûsî ya Rihayî de 14ê hezîrana 2018ine de vernîya weçînayîşê pêroyî de merdim û pawitoxê parlamenterê AKPyî Îbrahîm Halîl Yildiz hêrişê ferdê keyeyê Şenyaşarî kerdibî û hîrê ferdê keyeyî qetil kerdibî. Emîne Şenyaşar û lajê xo Ferît Şenyaşar (keyeyê Şenyaşarî) 9ê adara 2021 ra verê Edlîyeyê Rihayî de waştişê edaletî kenê ke dewa bi ca bêro. Nobeta Edaletî ya keyeyî roja 663ine de seba ewro peynîya hewteyî ya û edlîye padaye ya, keyeyê xo yê  Pirsûsî de dewam kerd.

	 

	Keyeyî serê hesabê xo yê Twitterî de roja peynîya serra 2022ine de vîdeoyêk derheqê Nobeta Edaletî

	de vila kerd û nê mesajî da: “Serra 2022ine bi zulm derbaz bi. Paweyê barajê 2023ine mend. Çîyo ke  dewlete serê lingan de verdeno edalet o. Wa serra 2023ine biba serra edaletî. Wa birînê ke gonî benê, bêrê dermankerdiş. Înna lîllahî û înna îleyhî Raciun.”