Roboskî de 34 kesê ke ameyî qetilkerdiş ameyî yadkerdiş 

2022-12-28 15:59:25


	 

	 

	ŞIRNEX - Serrgêra 11ine Qirkerdişê Roboskî de 19 ci ra tutî 34 kesê ke amebî qetilkerdiş ameyî yadkerdiş. Yadkerdişî de Hemsereka Pêroyî ya HDPyî Pervîn Buldane qisey kerd û vat: “Pêwa ke 11 serrî derbaz bîyê zî cipersayîşêkê xurt nêameyo kerdiş, kerdoxî nêameyê eşkerakerdiş. No seba Tirkîya şermêko pîl o.”

	 

	Teyareyê şerî yê artêşa tirke 28ê kanûna 2011î de tebere sînorî yê dewa Roboskî ke girêdayeyê qezaya Qilebanî ya Şirnexî ya bombarduman kerd û netîceyê bombardumanî de 19ê ci hema doman pêropîya 34 kesî ameyî qetilkerdiş. Hemsereka Pêroyî ya Partîya Demokratîke ya Şaran (HDP) Pervîn Buldan, wekîl û îdarekarî tewrê merasîmê serrgêra 11. ya Qirkerdişê Roboskî bîyî. Xeylêk temsîlkarê rêxistinanê komelê sivîlî zî tewrê merasîmî bîyî. Merasîm dewa Roboskî de ame kerdene. La verê merasîmî bi seyan leşker û polîsî sewqê Goristanê Roboskî ke 34 kesê ke ameybî qetilkerdiş tede ameyî definkerdiş bîyî. Vîrardişî ra ver Şirnex, Mêrdîn, Amed, Êlih û bajaranê dorme ra şar amey dewe. Keye û merdimê qurbanîyan fotografê qurbanîyan berz kerdî.

	 

	Keyeyê Roboskî ra Zekî Tosunî qisey kerd û vat: “Seba caardişê aştî û rewşa aramî ganî Roboskî de edalet pê bêro.” Hemserekê HDPyî ya Stenbolî Ferhat Encu zî qalê bêedaletiyê 11 serran kerd. Serekê Baroyê Şirnexî Rojhat Dîlsîz, diyar kerd ke hewl danê ke qetlîamî biniminê, 11 serrî 100 serrî derbaz bibo zî do hesabê qirkerdişê biperdê. Serekê TBByî Erînç Sagkan zî 100 serrî yo kurdî yenê qetilkerdiş û polîtîkayê bêcezaverdayîşî zî her tim dewre de yê. Serekê Baroyê Amedî Nahît Eren, dîyar kerdî ke eke kurdî welatijê nê welatî bê ganî makeqanûn bi edaletî têbigêrê. Serekê Baroyê Êlihî û eynî wextî de avûkatê keyeyê Roboskî ye Erkan Şenses zî derheqê dosya de qisey kerd.

	 

	Hemsereka Pêroyî ya HDPyî Pervîn Buldane zî merasîm de qisey kerd û vat: ''Ma reyna keye û merdimanê 34 qurbanan rê serweşîye wazenê. Rixmo ke nê qirkerdişî 11 serrî xo pey de verdayî hema zî derheqê ci de tehqîqatêko xurt nêameyo kerdene. No seba Tirkîya şermêka pîl a û dejêko xorin o. Kamî fermanê nê qirkerdişî dayo eşkera yo. Tek çîyo ke eşkera nîyo edalet û huqûq o. Mi ferasetêkê qirkerî de têrî yê. Feraseto ke lapat eşta Ferhat Encuyî û Roboskî de 34 merdimî qetil kerdo heman o.

	 

	Perwîne dewam de vat: “Na dewa do nêqeda. Heta ke kiştoxî hesab bidê, heta ke êyê ke ferman dayo û mesuldarî hesabê nê qirkerdişî bidê ma do têkoşînê xo rê dewam bikerê. Na birîne birîna ma ya pêroyînan a, dejê ma yo pêroyînan o. Heta ke edalet nêro caardene na birîne derman nêbena. Ma reyna vanê ke ma peyê têkoşînê şarê xo de yê.”

	 

	Dimayê qiseykerdişan vilî dayî serê goran û dia ameyî wendiş.