‘Cigêrayîşê ma yê heqîqetî bi bahaneyê belgeyan ame astengkerdiş’ 

2022-12-28 15:01:10


	 

	 

	Melike Aydin

	 

	ÎZMÎR - Yew avûkata dewaya Denîz Poyraze Turkan Aslan Agaçe, dîyar kerd ke dadgehe bi munaqeşeyê serê belgeyê destûrî hewl dana heqîqet asteng bikero, dîyar kerd ke waştişê ke do kerdoxî newe ra bêrê cipersayîş û Wezîrê Karê Zereyî yê sey teşwîqkar bêro cipersayîş, ameyî redkerdiş.

	 

	17ê hezîrana 2021ine de hemverê Partîya Demokratîke ya Şaran (HDP) yê Îzmîrî de hêriş pê ame û Onur Gencer, Denîz Poyraz qetil kerdibi. Roniştişê dewaya peynî 14ê teşrîna verêne de salona dadgeha Kampusê Zîndanê Şakranî de amebi vînayîş û netîce redkerdişê waştişê redî hekîmî yê keyeyî û avûkatan de, avûkatan dadgehe terk kerdibi roniştiş dewam kerdibi, dima ra taloqê 27ê kanûne yanî vizêrî amebi kerdiş. Roniştişê 7ine vizêr eywanê roniştişî yê Zîndanê Alîagayê Îzmîrî de ame organîzekerdiş. Heyetê dadgehe seba ke hîn avûkatan nêverda bikewê zere, bi seyan kesê ke seba paştdayîşê dewa ameyî verê zîndanî çalakîya roniştişî organîze kerdî. Vizêr qerar ame eşkerakerdiş. Dadgehe sûcê “kiştişê yê biqestî” cezaya heta hetayî girankerde sucê “xesar dayo mal û milkî” 4 serrî cezaya sucê “destnêdayîşê keyeyî” 2 serrî ceza, sûcê “muxalefetê hemverê qanûnê çekê gule rijnenê” 3 serrî cezaya zîndanî kiştox Onûr Gencerî rê birnayî.

	 

	Avûkata Denîz Poyraz, Turkan Aslan Agaç, derheqê roniştişî de ajansê ma rê qisey kerd.

	 

	Turkane, destpêkê qiseykerdişê xo de wina bale ant serê nêgirewtişî yê zereyî yê avûkatan û vat: “Derheqê qerarî de bêbelgeyê destûrî nêgirewtişê avûkatan û hêrişê hemverê avûkatan de serekê Yewîya Baroyan ê Tirkan (TBB) 23yê kanûne de bi Serdozgerîya Komare ya Îzmîrî, Serekîya Komîsyona Edaletî û Serekê Dadgehe rê pêvînayîş kerd. Sewbîna Heyetê ke TBByî ame awankerdiş û mîyan de serekê TBByî zî bîyaye waştî bi Heyetê Dadgehe rê pêvînayîş bikerê. Labelê nêverdayî ke bikewê eywanê roniştişî. Seba nêgîrê zere astengî vetî. Waştişê Heyetê TBByî bi rayîrê mubaşîran Heyetê Dadgehe rê ame neqlkerdiş. Heyetê Dadgehe zî bi rayîrê mubaşîr, da zanayîş ke qeraro ke ameyo dayîş în ku aîdê înan nîyo û qaydeyê zîndanî yo. Labelê selahîyetdarê cendermeyan zî da zanayîş ke telîmat Heyetê Dadgehe ra ameyo dayîş.”

	 

	

	‘Cigêrayîşê ma yê heqîqetî bi belgeyan ame astengkerdiş’

	 

	Turkane, dîyar kerd ke problemî ame çareserkerdiş Heyetê Dadgehe kewt eywana roniştişî û vat: "Heyetê Dadgehe waştişê ma qebûl nêkerd û reyke bîn avûkatan ke belgeyê destûrê bîyaye zî nêgirewtî zere. No çî bêhuqûqî yo û xebatê ma ameyî astengkerdiş. Munaqeşeyê serê belgeyê destûrî bi zaneyî kerdî rojeve. Hewl danê ke cigêrayîşê ma yê heqîqetî bi munaqeşeyê belgeyê destûrî asteng bikerê. Ganî na babete de hîn serkewtî. Heyetê Dadgehe hewl da ke goş nêdanê vatişê ma. Mexdûr zî nêgirewtî zereyê eywane û ma dewrêk wina ciwîyenê, no nîşaneyê sîstemê faşîzmî yo. Dadgehe nê çî nîşanê ma da.”

	 

	‘Welat de sey huqûq çin o yeno îdarekerdiş’

	 

	Avûkate Turkane, dîyar kerd bêhuqûqî û nêzdîbîyayîşê kêyfî sey rewşêka normal mojnenê û vat: “Kesê ke ronişenê xo heqdar vînenê. Îqtîdaro sîyasî, îdarekarîya nê welatî de her çî goreyê xo keno û hêzêk wina mîyanê xo de vîneno. Makeqanûnî çin hesibneno. Her ca de eynî çî keno. Welat de sey huqûq çin o yeno îdarekerdiş û mekanîzmayê bînî zî eynî çî kenê.”

	 

	'Îdîanameyî de kêmî estê’

	 

	Turkane, dewam de wina vat: “Îdianameyî de kêmî estê. Hêrişê hemverê bînaya HDPyî de pê ame. Seba nê sebebî zî hêriş hêrişêk sîyasî yê, dosyayêke edlî û cînayet nîyo. Hêrişo ke hemverê partîyêk sîyasî, yeno manaya hêrişê hemverê demokrasî. Makeqanûnê goreyê welatî tewrê sîyasetî bibê, ameyê sazkerdiş. Her çî goreyê nê ameyo amadekerdiş. Goreyê maddeyê 68ine ê makeqanûnî ganî partîyê sîyasî bêrê pawitiş. Ma zî waşt ke hêrişkar goreyê maddeyê makeqanûnî bêro muhakemekerdiş. Labelê îdianameyî de maddeyêk winasî çin o. Hêriş hemverê HDPyî, hemverê parekerdişê fikr û fehm û heqê rêxistinbîyayîş ameyo kerdiş. Hêrişî hemverê werteyî wedaritişê aştîya mîyanê komelî de pê yeno. Pawitişê HDPyî aîdê wezaretî yo. Labelê ma vînenê ke xeylêk reyan ekranê televîzyonî de serê Twitterî de HDP hedef mojnenê. Pesnê hêrişê faşîzane yê hemverê îdarekar û parlamenterê HDPyî keno. Nijadperestan teşwiqê hêriş kenê. Heta ewro zî Wezaretê Karê Zereyî hêrişê ke pê ameyî şermezar nêkerdo. Seba ke yê ke hêriş teşwiqkerdiş no bi xo yo. Ma derheqê babete de muracatê Serdozgerîya Komare ya Îzmîrî kerd. Ma waşt ke îdîanameyê ke bêro amadekerdiş wa bi dosyaya Denîz Poyraze reyde bikerê yew. La çi heyf  dadgehe nê çîyan qet verê çiman de nêgirewte.”

	 

	Avûkata Denîz Poyraz, Turkane qiseykerdişê xo wina qedêna: "Cezaya ke ameye dayîş wijdanê komelî rehet nêkena. Kesê ke hêriş teşwîq kerdê û kesê ke hetkarîya lojîstîk kerdo ganî vejîyê werte. Ma do prosesê îstînaf, Dadgeha Berzî û Dadgeha Heqê Merdiman ê Ewropayî (DMME) taqîb bikerê.”