Penîrê Wanî êdî luks o 

2022-12-05 10:52:46


	 

	 

	Zelal Tunç

	 

	WAN - Penîrê Wanî ke bi vaşî yeno viraştiş, sere de Wan de pêroyê Serhedî de sifreyan de ca gêno. Vayeya ke têdima yena vera êdî penîr bîyo luks.

	 

	Polîtîkaya şerî yê AKP-MHPyî vera krîzê ekonomî her ke şino xorî beno. Vayeyê ke têdima yenê vera hêzê herînayîşî yê şarî keweno. Sewbîna sînorê vêşanîye roj bi roje gird beno. Krîzê ekonomî ke her ke şino gird beno vera her çî de vayî virazîyena. Herêma Serhedî ke penîrê Wanî her sifre serî de esto, êdî penîr çinî yo. Penîrê Wanî ke werdê yewine yê sifreyanê areyîyan o, êdî luks o.

	 

	Suka Penîrî yê Îpekyolu yê Wanî ke verê cû her tewirê penîrî tede estbî de nika tewirê penîrî kêm bîyo. Vayeya penîrî vera şar êdî nêeşkeno penîr bigêro û biwero.

	 

	Berardoxkarî bi hesretê penîrî yê

	 

	Cinîya bi nameyê Kudret Altinare da zanayîş ke krîzê ekonomî û betalî vera dewa Kapikoyî ya Sarayî ya Wanî ra koçê Wanî kerda û vat ke seba domananê xo yê ke bajaranê bînan de cuyenê penîr gêna. Kudrete wina vat: “Seba ke vaye yo, ma dest veng agêrenî. Kîloyê penîrî 180î ra dest pê keno. Ez seba 4-5 kîloyî ameya. La ez do nika agêra. Verê ke ma koç bikerê 105 heywanê mi estbî. Ma werdê xo bi xo viraştêne. Dima ra heywanê ma qedîyayî û ma zî înan rot. Ma nika zî hesretê yew kilo penîrî yê.” 

	 

	Sifre bê penîr nêbeno

	 

	Kudrete da zanayîş ke sifre bê penîr nêbeno û wina dewam kerd: “5 kîlo şit bîyo 65 TL. Ma senî bigîrê. Ma nêeşkenê bigîrê. Vayeya penîrî goştî ra vîyarta. Ma aşmanê wisarî de hîna zêde girewt. La nika penîrê ma yo ke ma seba zimistanî girewtbî qedîya. Sifre bê penîr nêbeno. Ma tena penîrî ra tehm gênê. Ma nêzanê do senî bibo.”

	 

	‘Tirkîya de krîzêk gird esto’

	 

	Cinîya bi nameyê Nadîa Haşîma ke bajarê Zaxo yê Başûrê Kurdistanî ra seba penîr bigêra ameya Wanî da zanayîş ke aye hirê serrî yo ke seba penîr yena Wanî û wina vat: “Na serre penîr zêde vaye bî. Goreyê serranê verênan ma nêeşkenê bigîrê. Serranê verênan de kîlo 50-60 TL bî. Mi 170 Tlyî ra girewt. Ez penîrî ra xeylê hes kena. Ez di roje verê cû ameya. Tirkîya de krîzêk gird esto.”

	 

	‘Qiymetê heywankarî nêmend’ 

	 

	Sultan Guldena ke taxa Noşarî yê Qelqelî yê Wanî de cuyena wina vat: “Nizdîyê 20 heywanê mi estbî. Mi penîrê xo viraştêne. Bêşik xeylê zehmetîya ci esto. Tu erce heywankarî nêmendo. Ma penîrê xo virazenê. Werikêna ma tay zêde birotêne. La tu qiymetê ci nêmendo.”