'Ma do vera şerî de her ca têkoşîn bikerê'  

2022-11-27 12:11:28


	 

	 

	COLEMÊRG - Cînîyan reaksîyon vera hêrişê Tirkîya yê hemverê Kobanî mojnayî û dîyar kerdî ke do hemverê şerî de têkoşînê xo dewam bikerê.

	 

	Teyareyê şerî yê aydî Tirkîya bajarê Vakur û Rojhelatê Sûrîye û herêma Federal a Kurdistanî de xeylêk hêrişê hewayî ca ardî. Kobanê, Şehba, Dêrik û Girê Spî zî bombavaran kerd. Bajarê Kobanê ke vera DAIŞî têkoşînêk pîl yeno dayîş, girê Miştenur hedef ame girewtiş û nêweşxaneyê girî ame bombavarankerdiş. Hêrişê hewayî yê  herême, 11 kesî ameyî qetilkerdiş. Cinîyê Colemêrgî reaksîyon vera hêrişan mojnayî û vatî, do hemverê hêrişan her ware de do têkoşîn bikerê.

	 

	‘Mabêne 7ê Hezîran û 1ê Teşrîna Peyêne de hêrişê wina pê amebî'

	 

	Hemsereka HDPyî Colemêrgî Humeyra Armut da zanayîş ke hemverê Kurdan de şerê qirkerdîşî pê yeno û ma do hemverê pêro hêrişan têkoşîn bikerê. Humeyra wina vat: "Nimûneyê hêrişê Taksîmî verê zî xeylêk rayan ame ciwîyayîş. Bi taybetî mabêne 7ê Hezîrane û 1ê Teşrîna Peyêne de hêrişê bi nê hewayî pê ameyî. Îqtîdaro ke hêrişan dano serê rêxistinêke û xo meşrû kenê reyde rî bi rî yê. Hema çîyêkê derheqê hêrişê Taksîmî de dîyar nêbibi, wezîrê karê zereyî û serekkomar, sewbîna xeylêk sazgehan raste rast rêxistineke hedef girewtî û rayîrê hêrişê hemverê Kobanê akerdî."

	 

	‘Ganî her kes reaksîyonê xo bîyaro ziwan'

	 

	Humeyra dîyar kerd, vernîya weçînayîşî her wext vera Kurdan hêrişî bi ca ameyî û vat: "Hemverê Kobanê de hêrişî pê yenê. Ma pêro zanê ke netîceyê têkoşînêk pîl de Kobanê çimsûrîyê DAIŞî ra ameyo girewtiş. Kobanê de bi rayberîya cinîyan xoverdayîşêkê xurt ame mojnayîş û yê ke nê qebûl nêkerdî, hezim nêkerdî pratîkê şerî newe ra mojnayî û nika hemverê Kobanê de hêrişan pê anê. Xeylêk sivîlî nê hêrişan de dinyaya xo bedelnayî. Ganî her kes hemverê nê hêrişan de reaksîyon ramojno û vengê xo berz bikero."

	 

	

	‘Ma do her ca têkoşînê xo bikerê'

	 

	Hemsereka qezaya merkezî ya Colemêrgî Sînem Seven zî bale ant serê hêrişê AKP-MHPyî û dîyar kerd ke talîmatê hêrişan şewekê de ameyo dayîş û vat: "Nê hêrişî  hemverê destkewtişê cinî û şarê Kurdî yo. Îqtîdarê faşîstî vat ‘Kobanê ver bi kewtişî yo' la seba Kobanê nêkewt, tesîrêko gird serê înan de bi. Seba nê nika hêriş kenê. Bi nê hêrişan wazenê şarê Kurdî çin bikerê. Şarê  Kurdî bi seserran o têkoşîn keno û tu wext peyser game nêeştê. Do bi tepiştiş û qetilkerdişê ma nêqedênê. Ma do têkoşînê xo her ca de dewam bikerê."

	 

	

	‘Şerî rê nê'

	 

	Îdarekara HDPyî ya Colemêrgî Asya Akgul zî hêriş şermezar kerd û wina vat: “Heta hemverê Rojawan û herêma Kurdistanî hêrişî dewam bikerê, do feqîrî û krîzê ekonomî yê  welat zî her ke şêro giran bibo. Ganî tena şarê Kurdî ney, heme şar hemverê şerî de reaksîyonê xo bîyarê ziwan. Şer tu çîyêk nêdano kesî. Xêrcê zirarê şerî, çîyêk ra feydeyê ci çin o. Ez caardişê hemverê Kurdan û Kobanê şermezar kena. Ma do her ware de şerî ra vajê nê."