Cinîyê Şêrewa: Hemverê hêrişan de ma do xo ver bidê 

2022-11-22 11:25:42


	 

	 

	Hesna Mihemed

	 

	ŞEHBA - Cinîyê qezaya Şêrewa ya herêma Efrînî tesilî kerdî ke hemverê hêriş û abluqaya ke serê înan de ameya ferzkerdiş do xeta xoverdayîşî biweçînî û fek herr û nasnameyê xo ra vera nêdî.

	 

	Şêrewa qezayanê herêma Efrînî ra yew o. Qismêk na qezaye kewto binê kontrole dewleta tirke û komê girêdayeyê ci. Tena dewê Birc Qas, Zernaît, Meyasê, Gundê Mezin, Kelûtê û Ba Şemrê binê kontrolê Îdareyê Xoser yê herême de mendî. Rojawanê nê dewan de çeteye dagirkerî bi ca bîyî û hetê rojhelatê Nibilî de zî rejîmê Sûrîye esto. Her roje hemwetijê nê dewan raştê hêrişanê dewleta tirke yenî. Hetê Nibilî ra rayîrî serê nê dewan de ameyî girewtiş û îhtîyacê cuye nêdîyeno şarî. Na rewşe zehmetîyanê cuye zî xo reyde vejena raşte.  Hemverê nê astengîyan de şarê herême reyna zî vano ma do xoverdayîşê xo dewam bikerî û temsîlkarîye qebul nêkenî. Cinîyê qezaya Şêrawa ke binê abluqaya rejîmê Sûrîye û hêrişanê dewleta tirke de cuyenî ma reyde qisey kerdî.

	 

	'Ma rayîr nêdanî amacanê dewleta tirke û çeteyanê ci rê’

	 

	Awaş Mihemede verê cû dewa xo Kîmarî de cuyayêne la dagirkerîya dewleta tirke ke dewa aye talan kerd ra dima koçê dewa Birc Qasî kerda. Awaşe qala cuya xo ya dewe û binê abluqaye de senî cuyenî kerd û vat: “5 serî yo ke ez tewrê keyeyê xo dewa Birc Qasê de cuyena. Dewleta tirke dewa ma talan kerd. Seba ke hetêk dewe de çeteyê dewleta tirke estî, ma tîya de xeylê astengîyan cuyenî. Hêrişê ma kenî û heto bîn yê dewe de zî Nibil esto. Nibil de zî rejîmê Sûrîye bi ca bîyo û rayîran girewto. Ma tîya de kerdî mîyanê abluqa. Ma hetê temînkerdişê derman û pêro îhtîyacê cuye de zehmetî ancenî. Hemverê hêriş û ambargoya serê ma de ma reyna zî xoerdayîşî weçînenî û teslîmê înan nêbenî. Ma qetî nêverdenê ke yew kulmêk herra ma bikewa destê çeteyanê dagirkeran. Şêrawa de 6 dewî binê kotrolê dagirkeran de yî. Dewleta tirke wazena nê dewa bikera binê kontrolê xo.”

	 

	'Hemverê hêriş û abluqayan de ma do xoverdayîş biweçînî’

	 

	Hemîda Ehmed Nasroye zî hemwelatija dewa Birc Qasê ya. Hemîda qala xoverdayîşê şarî yê hemverê abluqa û hêrişê ke yenê kerdiş, kerd û vat: “Her roje dewleta tirke dewa ma bombarduman kena. Hetê rojawanê dewe dewleta tirke dagir kerda. Erd û baxçeyê ma aye hete de yî. Ma nêeşkenê bi asanî bivîyarî ewja. Ê kewtî sînorê mabenê ma û çeteyan. Domanî xeylê tersenî. Hetê rojhelatî de zî bajarokê Nibilî esto û rayîrê bazirganî û şîyaîşûameyîşê dewe ameyî girewtiş. Nêvedenê ke ma îhtîyacanê xo temîn bikerî. Hemverê şerê ke ma ser de danî rayraberdiş, reyna zî ma herra xo nêverdenî û dewe de cuyenî. Amacê dewleta tirke no yo ke dewijî koç bikerî. Ma cuyêke zehmetin ancenî la reyna zî ma vanê xoverdayîş û têkoşîn. Waştişê ma dewletanê mîyanneteweyîyan û rêxistinanê merdimîye ra no yo ke wayîrê herra xo bivejî û seba heqê sivîlan têbigêrî.”

	 

	'Ma do heta mergî dewe de xover bidî’

	 

	Tewr peynî helwetija kehene ya dewa Birc Qasê ra Hemîda Mihemede qisey kerd dû vat: “Ma do hemverê teda û zehmetîyê ke cuyenî herra xo nêteriknî. Obus û guleyê dewleta tirke û çeteyê aye serê ma de varenî. Pêro rayîran ma ser de girewtî. Nêwerdenê ke ma seba îhtîyacanê xo rayîran ra derbaz bibî. Vîşêrê dewa ma rayîrêke akerde çinî yo. Ma tîya ra vîşêr nêeşkenê şêrî cayna. Ma qet û tesilî herra xo û milkê xo nêverdenê dagirkeran rê. No hedefe dagirkeran o. Ma do heta mergî dewa xo de xover bidî. Waştişê ma no yo ke kesê ke koç kerdî wa agêrî ca û awarê xo.”