Hemverê krîzî de têkoşîn 

2022-11-21 14:41:32


	 

	 

	 

	WAN - Yew cinîya ke hemverê krîzê ekonomî de têkoşîn kena cinîya bi nameyê Berîvan Şahîn a. Berîvane atolyeyê xo de xişêranî kanî û xerabeyî newe viraznena û hem pê debare kena, hem zî kulturê xo dana ciwîyayîş.

	 

	Krîzê ekonomî roj bi roje giran beno û li goreyê dayeyê Merkezê  Cigêrayîşî Konfederasyonê Sendîkayê Karkerê Şorişgir (DÎSK-AR) hûmara cinîyê betalî 3 mîlyon û 709 hezar a. Pêwa nê hûmara cinîyê tewrê îstîhdamî beno zî kêm o. Cinîyan kare cîya de şuxilinê zî hem goreyê camêrdan kêm heqdest gênê, hem zî bi her tewirê teda, mobîng û desteştişî reyde yenê rî bi rî.

	 

	Kurdistan de tewr giran yeno hîskerdiş

	 

	Kurdistan de cinî krîzê ekonomî û feqîrî kûr ra hîs kenê û hemverê nê zî dest têkoşînî vera nêdanê. Cinîya bi nameyê  Berîvan Şahîne yew na cinîyan ra ya.

	 

	Xişêranê kanan newe ra viraznena

	 

	Berîvana ke Wan de ciwîyena dîyar kerd ke dimayê ke mektebe qedênaya betal menda û dikanêke yê kilîman de şuxilêna. Berîvane vat: “Ez xişiranê kanan newe ra viraznena. Nê xişiran eleqe dî. Wayîrê kargerî pêşnîyazîyêk kerd. Vat, ma bibê hemkar. Vat, qet çîyêk mede, tena xişir virazena. Ez zî demêk kilm uca de şuxilyaya.”

	 

	Gama ewilî

	 

	Berîvane da zanayîş ke her tim cigêrayîşêk de bîya û wina vat: “Ez demek uca de şuxilyaya û dima ra visyaya. Mi qerar da atolyeya xo awan bikera. Mi û embazêke xo ya unîversîta atolye akerd. Bi butçeyêke ma atolye akerd. Mi xişiranê kanî girewt û newe vurna. Mi parçeyê kaxizî ra morîk viraştî. Amancê mi ez vurnayîş bikerî. Sewbîna mi waşt ez kultur zî bidî ciwîyayîş.”

	 

	Her mewsim zehmetîyê ci cîya yo

	 

	Berîvane wina derg kerd: “Pêwa ekonomî her mewsimî zî zehmetîyê ci estê. Problemê ekonomî yenê ciwîyayîş. Hamnanî karê ma eleqe vîneno. Ma zî a gore têgêrenê. Zimistanî kar kêmî yo. Mi verê mamosteyî kerdêne. La mi zehmetî ant. Semedê cil û belgan û porê mi akerde bi, serê mi de ameyîne. Kes mi dir qisey nêkerdêne. Mi fek mamosteyî ra vera da. Seba ekonomî dem ameyîne ma werd nêdîne. Pêwa nê mi bi pereyêk kêmî hacetî girewtêne. Mi la, mûra girewtêne. Yarîya xo bi mi kerdêne. La no tewr zêde hêz da mi. Mi hemverê zor û zehmetiyan de têkoşîn da."

	 

	Berîvane wina qedêna: “Xişirê ke ez viraznena, kulturê ma yê. Herêma ma xeylêk xişir hes kenê. No kulturê ma ra yeno. Xişir, deqî kulturê ma nîşan danê. Ez nê sey kar nêvînena. Wazena bîyayîşê xo bidî ciwîyayîş. Keda dayîka mi serê mi de xeylêk zêde ya. Dayîka mi deştiş kena. Aye mi teşwîqê nê karî kerd.”