Mektubê ke dêsan ra derbaz benê (4)  

2022-11-17 11:23:45


	 

	 

	 

	Dîlan Babat

	 

	ANQARA - Aktîvîsta TJAye ya tepişte Ayla Akat Ataye seba 25ê Teşrîna Peyêne bi nê vatişan veng dana pêro cinîyan: “Şima tena nîyê, şima bîyî vengê ma. Şima tena nîyê. Ma mîyanê nê çar dêsan de bibê zî ma vanê ‘Jin jiyan azadî’, ma vanê ‘aştîya komelî û çareserîya demokratîk’.”

	 

	Cinîyê ke bi felsefeya "Jin jiyan azadî" hêz gênê û ver bi pêşwazîkerdişê 25ê Teşrîna Peyêne Roja Têkoşînê Vera Şîdetê Serê Cinîyan şinê, nizdîyê şorişê cinîyan yê dinya benê. Ma na dosyaye xo de cinîyê tepişte yê ke seba şorişê cinîyan têkoşîn dayî û coka ra hetê dewleta-camêrdî ra ameyî hedefgirewtiş, goşdarî kenê. Tevgerê Cinîyanê Azadan (TJA) ra Ayla Akat Ataya ke Zîndanê Cinîyan yê Sîncanî de yena tepiştiş bi nuşteyê xo veng dana.

	

	Ayla Akat Ataya ke bi seyan serrî cezaye yena muhakemekerdiş bi nasnameyê xo yê avûkatî, bi nasnameyê xo yê sîyasetmedarî û aktîvîsta heqê cinîyan yena zanayîş. Ayla heta nika têgêrayîşê cinîyan yê Kurdî û heqê merdiman de xeylê xebatan rayra berda û 20 Sibata 2018î de ameye tepiştiş. Ayla Akate verfekîya Kongreyê Cinîyan yê Azade (KJA) ke bi KHKyî ame girewtiş, kerde. Qiseykerdişê aye yê çalakî, bernameyî û xebatê cinîyan tepiştişê aye sey bahane ameyî mojnayîş.

	 

	Ma nika heqê vatişî dane Ayla Akat Ataye.

	 

	‘Merheba cinîyê rêzdarî!

	 

	Hirê wayê yewbînan, wayê Mîrabelî ke hemverê dîktatorîye de têkoşîn dayî, bi çimsûrîyêko gird destdertîyê bi înan ame kerdiş, ameyî qetilkerdiş û cesedê înan zinaran ra ameyî eştiş. Seba vîrardişê înan, seba ke nê cografyayan de reyna çîyêke winasî nêro cuyayîş, bi îradeyê paştîdayîşî, têkoşînî; vatiş, fikir, cinîyî çalakîyê 25ê Teşrîna Peyêne de bedêlan danê çiman ver û şîdetî rê vanê nê, ez înan silam kena.

	 

	Ma hetê fîzîkî ra verê şima de nîyê. Ma cinîyê ke fikirîyenê, wayîrê hişmendîye yê, îtîraz kenê, berardiş kenê, rêxistinkerdeyî û coka ra binê çekuya şîdetê dewlete de yê, ma do zîndanê ke teberêhuqûqî tede yenê tepiştiş û salonê mehkemayan de vengê xo tewrê vengê şima bikerê.

	 

	Şer û pêrodayîş yenê cuyayîş û heta îhtîmalê şerê nuklerî esto. Blokê rojhelat û rojava tuj bîyo. Bi Îdareyê Lîderanê populîstî rê, dîktatorî rê ber yeno akerdiş û hêzê dîktatorê bîyayeyan serdest beno. Raştîyêke dinya ya ke konseptê demokrasî, seyyewbînanî û heqê merdiman de manaya xo vînî kerdî, esta. Seba ma şert û merc se beno wa bibo têkoşîn û berardiş ferz keno.

	 

	Verê cû ma se cuyayî ma zanê, ma ewro bi çi yenê rî bi rî zanê. Serdest, yê ke qeraran danê her çend ke bi qebulnêkerdiş û zilmî de bê tesîr vera bidî zî dinya dinyayê cinîyê ke sere nêronenê, nêtersenê û bêveng nêmanenê yo zî.

	 

	Çimeyê şîdetî ke ma ci reyde yenê rî bi rî de şîdeto ke komel de yeno cuyayîş û şerê ke yenê cuyayîş estê. Sîstemo serdest her çend ke mabenê ma de dêsan berz bikero zî ma bi heskerdişo ke destê xo danê yewbînan, zerrîya xo de hewênenê. Ma vanê ke şîdetê hemverê cinîyan polîtîk o. Sînorê şîdetê hemverê cinîyan çinî yo. Ma keye, mekteb, karê raşteyan û zîndanan de zî nê caardişan reyde yenê rî bi rî. Ma her sinif û statuyî de nê çîyan cuyenî û her etnîsîte û kulturî de vînenê. Sewbîna yê ke qanûnan hadre kenê zî şikinan bêceza verdenê û ma şahidîya na rewşe kenê.

	 

	Çîyo pîroz û çîyo ke ganî bêro pawitiş cinî ya zî camêrd ferq nêkeno pêro merdimi wayîrê heq û azadîye yî; Ma sey merdim nê sey cinî vînenê, kinc, fikir û cuya ma kenê bahaneyê şîdetî. Adetê ke derheqê ma de qeraran gênî, ma ser de xo wayîrê heq vînenî, hêzê xo cinî û domanê kênayan gênî û înan hepsê keyeyan kenî reyde problemê ma esto. Coka ra probleme m abi zîhnîyet û sîstemî reyde esto. Ma qebul nêkenî û vanê ke no qederê ma nîyo.

	

	Cinîyê wayîrê cesaretê Marîa Mîrabele ya ke vana ‘Beno ke çîyo tewr nizdîyê ma merdg bo, la mi nêtersneno. Ez do seba her çîyo heqdar têkoşîn bikera’,

	 

	Cinîyê wayîrê qerardarîya Mînevra Mîrabele ya ke vana ‘Seba welatê ma ke bi dej û eleman dekerde yo, têkoşîn çimeyê kêfweşîye yo, roniştiş û bêvengîye zî cayê hîssînîye yo’,

	 

	Cinîyê wayîrê qerarê Patrîa Mîrabele ya ke vana ‘Ma nêeşkenê destur bidî, domanê ma do no rejîmê zextwer de bicuyî. Ma mecburî hemverê ci de bicuyî. Ez seba her çîyî hadre ya. Lazim bikero cuya xo zî dana.’ her cayê cîhanî de bi têkoşîno ke danî benê umud.

	

	Bado ke Jîna Emînîye hetê ‘polîsanê ehlaqî’ ra ameye qetilkerdiş cinîyî bi vatişê ‘eke por çinî bo gune zî çinîyo’ porê xo birnayî û vejîyayî raşteyan. Cinîyî bi îdîayê Jin Jiyan Azadî, Cinî Cuye Azadî cewabêk manîdar dayî rejîmî û îdîayê cinîyan gird beno.

	Ma cinîyê tepişteyî yê ‘Dewaya kumpasî ya Kobanê’ dîyar kenê ke fikrê ma fikarî de yo, zîndanan de ca nêbeno. Ma fikr û beradişê xo domnenî.

	 

	Ez vana fikr û raman…

	Çalakîya esas û zelal ya ke ferqê merdimbîyayîşî roneno raşte.

	Senî yeno zanayîş wa bêro zanayîş, hewno bi ters yê îqtîdarîyî, tehluke yo.

	Ya yeno zanayîş ya zî nîno zanayîş; babeta vatişî malê merdimîye bîyo û nêbîyo.

	Barê giranan xo reyde ardo.

	Çîyo ke sivik keno zî xobîyayîş û merdimîye de israr o.

	Wina nîyo …?

	Vatişê Goethe ‘Rihê erdî ra derbaz beno şino / Nîmetê tewr weşî zî.  /Fikrê ma yê wext vîyartişî  / Fikrê ke tesîr kerdî / tena ê estî, hende bêpeynîbîyayîş’ nêvanê acaba, eke lazim bibo bedel bêro dîyîş, ganî fikr û ramanan de bêro dewamkerdiş.

	Şima tena nînyî, şima bîyî vengê ma. Şima tena nîyî. Ma mîyanê nê çar dêsan de bibî zî ma vanê ‘Jin jiyan azadî’, ma vanê ‘aştîya komelî û çareserîya demokratîk’.

	 

	SIBA: Midûra Karê Nuşteyî ya Ajansê Mezopotamyayî Dîren Yurtsever, Zîndanê Cinîyan ê Sîncanî ra nuşte.