Merdimê tepişteyan verê zîndanî de veng dayî 

2022-11-15 14:49:58


	 

	 

	AMED - Nobeta Edaletî ya ke merdimê tepişteyan seba tepişteyê nêweşî bêrê veradayîş dewam keno. Keyeyê tepişteyan çarçewaya çalakîya xo de ewro verê Zîndanê Amedî de eşkerayîyêke dayî çapemenîye û waştişê veradayîşê tepişteyan kerdî.

	 

	Nobeta Edaletî ya keyeyê tepişteyanê nêweşan û tepişteyê ke înfazê înan ameyo veşnayîş, roja 365ine de verê berê Zîndanê Tîpê Dyê Amedî dewam kerd. Komeleya Hetkarî û Piştdayîşê bi Keyeyê Tepişteyan û Hikûmwerdoxan (TUAY-DER) yê Amedî, Komeleya Yewîya Kulturê Paştdayîşî û Hetkarîya bi Kesê Merdimê Xo Dergûşê Şaristanî Vînî Kerdê dir (MEBYA-DER), Komeleya Cigêrayîşê Kultur û Ziwanê Mezopotamyayî (MED-DER), Komeleya 78ine û endamê Partîya Demokratîke ya Şaran (HDP) û Partîya Herêmê Demokratîk (DBP) yê Amedî zî paştdayîş dayî çalakîya keyeyan. Çalakî de keyeyan reaksîyon vera Wezaretê Edaletî dayî û seba tewrbîyayîşê yewin serrgêra nobete venga şarî, sazgeh, dezgeh û partiyê sîyasî kerdî.

	 

	Çalakî de yew ci ra merdimê tepişteya nêweşe Nazîme Boltan qisey kerd û da zanayîş ke nobeta înan a edaletî serrêke pey xo de verdena. Nazîme, dîyar kerd ke bi serrêke yo edalet gêrenê la tu edaletî nêdîyê. Nazîme dewam de wina vat: “Nêweşê ma yê giranî wa bêrê veradayîş ke ma bieşkê tedawîya înan bikerê. Gama ke şima înan benê nêweşxaneyan, raporê tutanê ma bidê.  Waştişê tutanê ma bi ca bîyarê. Mîyanê tepişteyan de cîyayîyan mekerê. Tutê ma verê mergî de yê. Şîdet û zulm înan rê mekerê. Kitabanê tutanê ma arêdanê û demo ke tutê ma persan kenê zî înan derb kenê û heqaret înan rê kenê. Ma ê heqaretan tu wext qebûl nêkenê. Tena tutê mi nê, ez zulmê serê tu tutan qebûl nêkena. Ma do heta peynîye serê rêça tutanê xo de bê.”

	 

	Çalakî bi sloganê,“Heq, huqûq, edalet" û "Biciwîyo xoverdayîşê zindanan" peynî bi.