‘Nobeta Edaletî’ ya Keyeyê Şenyaşarî 611 rojî yo dewam kena

2022-11-09 15:55:30


	 

	 

	RIHA - Çalakîya "Nobeta Edaletî" ya Keyeyê Şenyaşarî 611 rojî yo dewam kena. Keye, pêwa hewayê serdî zî çalakîya xo keno, dîyar kerd ke kiştox xo pey îqtîdarî de nimito.

	 

	Çalakîya "Nobeta Edaletî" ya Emîne Şenyaşar û lajê ci Ferît Şenyaşar ke verê Edlîyeya Rihayî de roja 611ine de dewam kena. Keye pêwa hewayê serdî zî qezaya Pirsûsî ame merkezê Rihayî û verê edlîye de nobete girewt.

	 

	Ferît Şenyaşar çalakîye de qisey kerd û vat: “Dewaya ma dewaya partîye nîya. Dewaya ma bi temamê merdimayî ya. Ganî her merdim wayîrê çalakîya ma vejîyo. Dîmenê kamera îdianameyî de ca nêgirewtê. Werte de sûcêkê merdimayî esto. Ganî kiştoxî bêrê cezakerdiş. Dayîka mi vana, heta ke lajê mi nêro veradayîş û edalet bi ca nêro, do tîya ra nêşêro. Waştişê ma bi temamî huqûqî yo. Ma paweyê edaletîyê ke bi ca bêro. Kiştoxan xo pey îqtîdaran de nimito. Ganî AKP na babete de helwestêk zelal nîşan bido. Heta ke AKP helwestêk zelal nêdo ro, do nêeşko vejîyo mîyanê şarê Rihayî.”