Cinîyê ke tewrê rayîr ra şîyayîşê Silopîyî bî: Têkoşînê ma her ca de yo 

2022-11-07 11:42:50


	 

	 

	Sema Çaglak

	 

	ŞIRNEX - Cinîyê ke tewrê rayraşîyayîşê Silopî yî bîyî dîyar kerdî ke Şarê Kurd hêz û têkoşînê xo ra tavîz nêdano û wina vatî: “Têkoşînê ma her ca de yo.”

	 

	Hemverê şixulnayîşê çekanê kîmyewîyan de qezaya Silopî ya Şirnexî de bi serkêşîya Partîya Demokratîke ya Şaran (HDP), Kongreya Komela Demokratîke (KCD), Partîya Herêmê Demokratîkî (DBP), Tevgerê Cinîyanê Azadan (TJA), Komeleya Yewîye Kultur û Paştîdayîşî û Hetkarîya bi Kesê ke Merdimanê Xo Dergûşa Şaristanîye de Vînî Kerdî (MEBYA-DER), Komeleya Paştîdayîşê bi Keyeyê Tepişteyan û Hukmweran reyde (TUAY-DER), Komeleya Cigêrayîşê Kultur û Ziwanî yê Mezopotamya (MED-DER), Merkezê Kulturî yê Mezopotamya (NÇM), Platformê Koçberîye, Meclîsê Ciwanan yê HDPyî û Têgêrayîşê Ekolojîye yê Mezopotamya pê slogana "Hemverê çeke kîmyewîyî de rayîr ra şîyayîşê merdimîye" rayîr ra şîyayîş organîze kerdî. Verê despêkerdişê rayîr ra şîyayîşî heme rayîrê ke şinê Berê Sînorî yê Xabûrî hetê bi seyan leşker û polîsan ra ameyî girewtiş. Rixmê heme astenkerdişan şar rayî ra şî. Cinîyê ke bajaranê cîyayan ra tewrê rayîr ra şîyayîşî bîyî dîyar kerdî ke Şarê Kurd qerardar o û do bi ser bikewo. 

	 

	‘Ma hêz û têkoşînê xo ra tavîz nêdanê’

	 

	Endama Meclîsê HDPyî ya Mêrdînî Perîhan Agaogluye dîyar kerd ke girseyo ke tewrê rayîr ra şîyayîşî bî hemverê pêro caardişan de xover da û vat: “Seke yeno zanayîş 17 gerîlayê têkoşînê azadîye netîceyê hêrişê çeke kîmyewîyî de dinyaya xo bedelnayî. Pêroyê dinya de şixulnayîşê nê çekan qedexe yo û sey sûcê şerî yeno binamekerdiş. La gama ke babete bena kurd, pêro qanûnê şerî yenê binpaykerdiş û  dinya hemverê nê caaardişan de xo bêveng kena. Ma zî seba na bêvengîye rayîr ra şîyayîş viraşt. La çi heyfo ke dewlete heme hêzê xo Silopî de arê da. Heme rayîrî ameyî girewtiş û ma kerdî abluqa mîyan. La şar astengîyan nêşinasna û xover da. Awa pît û bi gazan her hetî ra hêrişê raşte kerdî. La ma qerardar bî. Çend reyan bi pêro hêzê xo hêriş kerdî la girde hêz û têkoşînê xo ra tavîz nêda. Pê slogan û xoverdayîşî şar hemverê faşîzmî de nizdîbîyayîşê xo mojna.” 

	 

	‘Şarê Kurd gamêk tepîya nêeşt’

	 

	Hemsereka HDPyî ya qezaya Seyhanî ya Edene Şukran Efeturke zî qisey kerd û da zanayîş ke înan pê têkoşînê xo rayîr ra şîyayîş resnayî hedefe xo û wina dewam kerd: “No rayîr ra şîyayîşê merdimîye û demokrasî bî. Waştî ke rayîr ra şîyayîşê ma asteng bikerê. La şar qeradar bî û vera hêrişan de xover da. Şar qet gamêk tepîya nêeşt.”

	 

	‘Tutanê kurdan ra tersenê’

	 

	Endama Dayîkê Aştîye ya Mersînî Nafîye Çobane ard ziwan ke Şarê Kurd cewabê xo yê hemverê hêrişan da û wina vat: “Destpêkerdişî ra heta peynî hêriş kerdî. Waştî ke vindetişê ma bişiknê. La Şarê Kurdî cewabê xo yê seba nê hêrişan da. Ez veng dana Erdoganî; acaba do hêrişanê xo heta key dewam bikero. Êdî bes o ke gonî ameye rijnayîş. Qesebaya heme dayîkan vêşena. Wa êdî aştîyêka daîmî serê her ama de pê bêra. Wina asîyeno ke ma ra tersenê. Tutanê kurdan ra tersenê. Wazenê ke kurdî sere nêwedarnê. La kurdî bi têkoşînê xo cewab dayî. Wa bizanî ke kurdî bi tepiştiş, kiştiş û zilmî nêqedîyenê. Ma do ser bikewê.” 

	 

	‘Ma nêqedîyenî’

	 

	Endama Dayîkê Aştîye ya Mersînî Hanîfe Umîte zî şixulnayîşê çeke kîmyewîyan şermizar kerd û vat: “Hemverê na bêvengîye û şerî de ma tîya de yê. Bi saetan hêrişê ma kerdî. Her çend ke hêriş bikerî zî ma nêqedîyenê. Ma heme dayîkî seba aştîye û hemverê sûcê merdimîye de tîya de yê. Xoverdayîşê girseyî pîroz kena. No xoverdayîş umud dano. Ma do biresê hedefe xo.”

	 

	‘Têkoşîna ma her ca de yo’

	 

	Tewr peyîn zî Endama Dayîkê Aştîye ya Silopî Feyrûz Çagatay qisey kerd û bale ante serê hemkarîya PDKyî û wina vat: “Ma hemverê çekanê kimyewîyan ê û nêwazenê nê çekî hemverê kurdan de bêrê şuxilnayîş. Sewbîna ma hemverê xîyanetê Mesûd Barzanî de tîya yê. Wa o zî têkoşîn û hêrsê Şarê Kurdî bivîno û wa fek nê şirîktîyê bi dewleta Tirke dir vera bido. Ma seba aştî, hizûr û tîfaqî ameyî. Wa nê çekê kimyewî êdî serê tu şarî de nêrê şuxilnayîş. Nêwazenê ke kurdî sereyê xo wedarnê. Gama ke  kurdî sere wedarnenê, wazenê înan bêveng bikerê. Ma nê qebûl nêkenê. Ma semedê nê tîya yê û têkoşînê ma her ca de yo.”