‘Serkewtişê Kobanê bi hêvîya cinîyan’ 

2022-11-01 11:51:21


	 

	Hêlîn Asmîn

	 

	QAMIŞLO - Endama Meclîsê Cinîyan ya PYDyî ya Herêma Cizîrî Nayîme Hesene derheqê 1ê Teşrîna Peyêne Roja Kobanê ya Cîhane de ercnayîşan kerd. Nayîmeye bale ant têkoşînê cinîyanê kurdan yê Kobanê û wina vat: “Xoverdayîşê Kobanê ca da ke reyna Şorişê Rojawanî gur bibo. Bi serkêşîya Arîn û Rêvanan serkewtişê Kobanê bî umudê cinîyan.

	 

	Çeteyê DAIŞî 15 êlula 2014î de hirê hetan ra hêrişê Kobanê kerd. Çeteyan bi zîhnîyetê kiştişî, talan û rijnayîşî bi heme tewir çek û cebilxaneyê giranan hêrişê Kobanê kerdî. Hemverê her tewir çek û cebilxaneyî de Şervanê Yewîya Pawitişê Cinîyan (YPJ) û Yewîya Pawitişê Şarî (YPG) xoverdayîşêko efsanewî pê ardî. Netîceyê xoverdayîşê yew aşme û nîme de şervanan cîhane de veng da. Bi hawayêko hempar 1ê Teşrîna Peyêne ya 2014î de hirê hetê Kurdistanî û 30 dewletê cîhanî de çalakîyê paştîdayîşê Kobanê dest pêkerdî. Bi mîlyonan şar silogananê silamkerdişê xoverdayîşê şervanan û nîşaneyê serkewtişî berz kerdî. Bi no hawa 1ê Teşrîna Peyêne sey roja cîhane ya paştîdayîşê Kobanê ameye qebulkerdiş û ame vatene ke her serre no tarîx de pêroyê dinya de çalakîyî do bêrî viraştiş. Kobanê badê şerê şîdetin, xoverdayîşê gird yê Şarê Kurdî, paştîdayîş û paştîdayîşê cîhanî 26ê Çeleyê 2015î de rizgar bi. Bi wesîleya 1ê Teşrîna Peyêne ya Roja Kobanê ya Cîhane endama Meclîsê Cinîyan ya Partîya Yewîya Demokratîke (PYD) ya herêma Cizîrî Nayîme Hesen ajansê ma rê qisey kerd.

	 

	'Şerê Kobanê bi rihê şehîdanê Kobanê ser kewt’

	 

	Nayîme Hesene destpêkê qiseykerdişê xo de vat ke 1ê Teşrîna Peyêne ya Roja Kobanê ya Cîhane de xoverdayîşê Kobanê verda ke Şorişê Rojawanî gur bibo û vat: “Ez sere de roja pêroyê cinîyanê têkoşer û şervananê YPJyî pîroz kena. Şerê ke Kobanê ame rayraberdiş tena seba Kobanê û kurdan nê, bi serkêşîya cinîyanê kurdan seba pêroyê cinîyanê cîhanî no şer ame rayraberdiş. Şerê Kobanê bi rihê şehîdanê Kobanê û hêzê YPJ û YPGyî ser kewt. Bî sembolê dinya. Xoverdayîşê cinîyanê kurdan şexsê Arîn Mîrkan de, çeteyê Erdoganî Kobanê têk berd. Amacê dewleta tirke ya îşxalkerdoxe fetisnayîşê çilaya 19ê Temmuze bi. Coka ra Erdogan tim vatêne ‘Kobanê kewt, ha kewt’ la Kobanê nêkewt, bî bajarê xoverdayîşî. Xoverdayîşê Kobanê ca da ke Şorişê Rojawanî gur bibo.”

	 

	'Serkewtişê Kobanê bî hêvîya cinîyan’

	 

	Nayîme dewamê qiseykerdişê xo de qala xoverdayîşê cinîyanê Kobanê û şervananê YPJyî kerd û wina vat: “Pêro dinya hemverê xoverdayîşê cinîyanê kurdan de şaş mend. Çeteyê DAIŞî bi hemkarîya dewleta tirke bi pêro hêzê xo hêrişê Kobanê kerd. Tarîx de reyan yewina ke bajarêko wina şenik bi wehşetêko wina gird reyde rî bi rî maneno. Ez eşkena vaja ke şervan û şarê Kobanê pêro dinya tarîtîye ra xelesna. Çimkî DAIŞ hêzo tewr tarî yê dinya bî. Şerê Kobanê tena seba Kobanê û şarê Kobanê nêame rayraberdiş, seba pêroyê dinya ame rayraberdiş û bi nimune. Şerê Kobanê seba pêroyê dinya ame rayraberdiş û heta nika zî no şer dewam kerdo. Serkewtişê Kobanê eynî wext de bî tersê îqtîdaran. Seke Rayberê Şarê Kurdî zî vano do seserra 21ine biba seserra cinîyan. No Kobanê de ame îspatkerdiş. Senî ke şorişê Kobanê destpêkerd û vilayê pêroyê Rojawanê Kurdistan, Vakur û Rojhelatê Sûrîye bî, nika roja ma ya ewro de Rojhelatê Kurdistan û Îranî de bi serkêşîya cinîyan şoriş reyna vila beno.”

	 

	'Ma do têkoşînê xo tîya ra pê zî dewam bikerê’

	 

	Nayîme ard ziwan ke Erdogan polîtîkaya xo ya hemverê Kurdan û Rojawanê Kurdistanî û şerê Kobanê de têk şî û dewam kerd: “Erdogan û çeteye xo senî ke Kobanê têk şîyî do nika zî têk şêrê. Do polîtîkayê înan yê Vakur û Rojhelatê Sûrîye de zî têk şêrê. Hêrişê dewlata tirke ya îşxalkerdoxe qet netîce nêgiretî. Her çend ke dewleta tirke bi çekanê xo û teyareyanê xo yê bê merdiman hêriş bikera zî ma do sey cinî û şarê herême her tewir xo ver bidê. Hêrişê dewleta tirke ya dagirker qet têkoşîn nêeşkayî têkoşîn bidê vindarnayîş. Erdogano ke bi rayîrê çeteyan waşt şoriş têk bero, nika zî bi raybazêko akerde hêriş keno. Ez eşkena vaka ke xoverdyîşê ma do dewam bikero. Heta ke ma sey şarê kurdî bîyayîşê xo meşru nêkerê do têkoşînê ma dewam bikero.”

	 

	'Şorişê Rojawanî, şorişê cinîyan o’

	 

	Nayîme qiseykerdişê xo yê peyênan de zî wina vat: “Ez bi rihê 1ê Teşrîna Peyêne ya Roja Kobanê ya Dinya vana ke ma do bi rihê Arîn û Rêvanan bieşkû dinyayêka newe û demokratîke awan bikerê. Nê semedî ra ganî cinîyî pêroyê raşteyê cuye de xo rêxistin bikerê. Hemverê pêro hêrişanê îqtîdarî de bieşka xo newe ra awan bikera. Wa cinî bieşka cuyêka xozayî ke pêro netewî bieşkê tede asanî bicuyî, awan bikera. Senî ke ma 1ê Teşrîna Peyêne kerd Roja Kobanê ya Dinya, ma do Şorişê Rojawanî zî bikerî şorişê cinîyan yê dinya. Ez reyna 1ê Teşrîna Peyêne ya Roja Kobanê ya Dinya yê pêro Şehîdanê Kobanê û şervananê azadîye pîroz kena.”