'Heta rojnamegerî bêrê veradayîş ma do heqîqet şarî rê neql bikerê’  

2022-10-26 11:16:23


	 

	 

	WAN - Çarçewaya cipersayîşê Serdozgerîya Komere ya Anqara de vizêr 9 bajaran vera rojanmegeran operasyonê qirkerdişê sîyasîyî ame kerdiş û 11 rojnamegerî pê îşkenceyî ameyî destbendkerdiş. Derheqê babete de cinîyan wina vat: “Heta ê bêrî veradayîş, ma do mîyanê her şertî de bibî vengê Şarê Kurdî, vengê cinîyan û heqîqetî biresnê şarî.” 

	 

	Çarçewaya cipersayîşê Serdozgerîya Komere ya Anqara de vizêr 9 bajaran vera rojnamegeran de operasyonê qirkerdişê sîyasîyî ame kerdiş û 11 rojnamegerî pê îşkenceyî ameyî destbendkerdiş. Sereştişê keyeyan de muxabîrê ma JinNewsî Habibe Eren û Oznur Deger, Mudira Karanê Nuştuşî ya Ajansê Mezopotamya (MA) Dîren Yurtveser, muxabîrê MA Deniz Nazlim, Selman Guzelyuz, Zemo Aggoz, Bêrîvan Altan, Hakan Yalçin, Emrullah Acar û Ceylan Şahinli û rojnameger Mehmet Gunhan pê îşkenceyê polîsan ameyî destbendkerdiş. Çarçewaya cipersayîşêko cîya ra zî bi îdîayê cezaya aye ameya tesdîqkerdiş, rojnameger Derya Rene ameye tepiştiş.

	 

	Asayîşê Anqara da zanayîş ke rojnamegerî rîyê xeberanê ke viraştî ra ameyî destbendkerdiş. Derheqê dosya de qerarê nimitişî ame girewtiş û 24 saet pêvînayîşê avûkatan ame qedexekerdiş. Dozgerîye wextê nezaretî yê 11 rojnamegeran yew roje kerd derg.

	 

	Destbendkerdişê rojnamegeran ra dima reaksîyonî zêdîyayî. Bajarê Wanî de cinîyan seba verdayîşê rojnamegeran veng da.

	 

	‘Ma do kamera û mîkrofonê înan dewr bigêrê’

	 

	Endama Heyetê Weşanî ya Kovara  Jineolojîye Dilan Yildize daye zanayîş ke dozgerî biwaza eşkena pê telefonî seba îfadedayîşî venda rojnamegeran û îfadeyê înan bigîra, la rojnamegerî bi derbkerdiş û îşkenceyî ameyî destbendkerdiş. Na rewşe nîna qebulkerdiş. Dilane wina vat: “Wazenê ke rojnamegerî vengê xo nêkerê. Çike êdî tehemmul nêkenê ke şar raştîyan bizano. Xeylê kesî estê ke mikrofon û kameraya înan wedarno. Ê pêro xebatkaranê çapemenîye bitepişnê zî ma do sey xebatkarê çapemenîye raşteyan de bibê. ma do sey rojnamegeran kamera û makînaya fotografî bigêrî û xeberan virazê.” 

	 

	'AKP tena wazeno hetgirê ci bixebetê’

	 

	Verfeka Meclîsê Cinîyan ya Partîya Herêmê Demokratîkî (DBP) Aynur Saricaye zî dîyar kerde ke hêrişê vera rojnamegeran hêrişê heqê girewtişê xeberan yê Şarê Kurdî yo û vat: “Ma nê hêrişan esasê xo de sey hêrişê ke vera cinîyan de yenê kerdiş, qebul kenê. Wazenê cinîyî û Şarê Kurdî vengê xo nêkerê. AKP  heta wazeno hetgirê ci bêxebetê. Ma wina qebul nêkenê. Lazim bikero ma do herinda rojnamegeran de xeberan virazê, heta ke ê bêrî veradayîş.”

	 

	'Ma do vatişê heqîqetî dewam bikerê’

	 

	Parlamentera Partîya Demokratîke ya Şaran (HDP) ya Wanî Muazzez Orhane vat ke hêrişê vera çapemenîye yê AKP û MHPyî sistematik ê û vat: “Zextê destbendkerdişan heta ewro nêresayo hedefe xo. Do tîya pêy zî ê nêresê hedefanê xo. Operasyonê bi Qanûnê Sansûrî reyde eleqedar o. Wazenê vengê şarî nêvejîyo. Kaleme çapemenîya azade qet erdî de nêmendo û do nêmano zî. Ma do vatişê heqîqetî dewam bikerê.”

	 

	'Cinî û Şarê Kurd yenê hedefgirewtiş’

	 

	Tewr peynî Hemsereka Serhat GOÇ-DERî Gulşen Kurte qisey kerde û aye zî vat: “Operasyonê vera çapemenîya azade de yeno waştiş ke Şarê Kurd vengê xo nêkero. Ma serê nameyê embazanê xo yê ke ameyî destbendkerdiş raşteyan de bibê. nê opersayonan de eşkera asîyeno ke cinî û Şarê Kurd yenê hedefgirewtiş. Ma do zî mîyanê her şertî de vatişê înan bivajê û vengê xo berz bikerê.”