Têkoşînê vera huqûqî de bi ca nêno: Nobeta Edaletî 

2022-10-25 14:46:47


	 

	 

	ÎZMÎR - Merdimê tepişteyan ra Sultan Yagmekan da zanayîş ke binpaykerdişê heqan ê zîndanan de huqûq bi ca nêno û hemverê nê têkoşînê nobeta Edeletî dewam kena. Sultane venga paştdayîşê nobete kerd.

	 

	Nobeta Edeletî ya hetê merdimanê tepişteyan ra bi amancê tepişteyê nêweşî ke înfazê înan ameyê veşnayîş bêrê veradayîş û pêro zîndanan de tecrîd bi peynî bibo, amebî destpêkerdiş, dewam kena. Keyeyê Wan, Stenbol, Amed û Îzmîr de nobete dewam kenê, eynî wextî de bale ancenê serê binpaykerdişê heqan ê yenê ciwîyayîş û venga paştdayîşê nobete kenê.

	 

	Sultan Yagmekan ke Nobeta Edeletî ya Îzmîrî de ca gêna lajê ci Firat Yagmekan yew tepişteyo nêweş o. Lajê ci Firat ke zîndanê Kiriklarî yê Buca de tepişte yo, xeylêk nêweşîyê ci estê. Sultane da zanayîş ke lajê ci û heme tepişteyê nêweşî bêrê veradayîş, tecrîd û tedayê serê tepişteyan ganî bêrê wedaritiş. Sultane dîyar kerd ke binpaykerdişê zîndanan hem tepişteyan, hem keyeyanê înan hedef gênê.

	 

	‘Tepişteyê sîyasî yewbînan ra dûr fînenê’

	

	Sultane wina bale ant serê tedayê siyasî: “Lajê mi 16 serrî yo tepişte yo. Serê tutanê ma de teda û zulmêk pîl esto. Yewbînan ra dûr fînenê. Tepişteyê edlî yan zî feto kenê mabêne înan. Hewl danê, tepişteyê sîyasî yewbînan ra bivisnê. Xebera înan yewbînan ra çin a. Verê her tim xebera înan yewbînan ra estbî. Têhet de bî. Tutê ma pêro nêweş ê. Dewa lajê mi nika  ÎHDyî yo. Xeylêk nêweşîyê ci estê. Şêro doktor ganî doktoro pispor bo, doktorê ke şinê înan rê zî baş nêewnîyenê înan ra. Erzenê serê koxuşan. Pêvînayîşan asteng kenê.  Her tim koxuşê înan vurnenê. Ma nêzanê tutê ma kam ci koxuşan de yê. Serê tepişteyan de tecrîd esto. Ma qebûl nêkenê. Ma dayîkî têkoşîn kenê û wuştî serê lingan. Ma nobeta edeletî da destpêkerdiş. Ma 6-7 dayîkî nobete gênê.”

	 

	‘Pêvînayîşî yenê astengkerdiş’

	 

	Sultane dewam de wina vat: “A rojan pêvînayîşê akerde estbî. Rojêke vernîya ci ma zîndan gêrayî. La cewab nêdayî. Serê siba saete 10.00ine de reyna gêrayî. Vatî vatiş qedyî yo. Yanî nêwazenê ma tutanê xo bivînê. Ma yewbînan ra dûr fînenê.”

	 

	‘Mudir berpirsîyar o’

	 

	Sultane vat, Haydar Alî Ak ke di serrî verê sey mudir tayînê zîndanê Kiriklarî bîyo, problemêkê yenê ciwîyayîşî de rolê ci zaf pîl o û vat: “Mudirêkê bi nameyê Haydar Alî ame. Roja ke o ameyo, rewşa tutanê ma baş nêya. Se kerd nê mudirî kerd. Bawer a Edîrne ra ameyo. Nê pêrûnan ra wezîrê dade berpirsîyar o.  Serekkomar û selahîyetdarê dewlete nê kenê.”

	 

	‘Ma edalet wazenê’

	 

	Sultane tewr peyîn wina vat: “Ez hemverê binpaykerdişan, venga rayaumûmî kena. Ma wezîfeyê xo kenê, ça beno wa bibo, ma do roşê. Tutê ma tepişteyê azadîye yê. Heta destê ma ra bêro, ma do zî têkoşîn bikerê. Ma pêro dayîkan pawenê. Ganî ma pêro paştdayîş bidê yewbînan. Ê tutê nê şarî yê. Ez venga heme kesan kena ke paştdayîş bidê nobete. Ma di kesî zî bimanê, ma do têkoşîn bikerê.”