'Ma do têkoşînê Nagîhane dewam bikerê' 

2022-10-16 11:15:33


	 

	WAN - Cinîyê Wanijî reaksîyon vera nêzdbîyayîşê hemverê merasîmê cenazeya Nagîhane mojnayî û vatî: "Nêzdbîyayîşê hemverê cenazeya Nagîhane sûc o û do no zîhnîyetp lêşin hesab bîdo. Ma do wayîrê têkoşînê Nagîhane vejîyê."

	
		 


	Akademîsyene, rojnamegere û endama Akademîya Jineolojî Nagîhan Akarsele 4ê teşrîna verêne de verê keyeyê xo yê taxa Bextiyarî ya Silêmaniye de netîceyê hêrişêkê çekdarî yê MÎTê Tirkî de ameye qetilkerdiş. Dimayê çend saetan kiştox serê tedayê cinîyan û welatijan amebi tepiştiş.

	 

	Dimayê ameyîşê endamê keyeyê Nagîhane û heyetêkê HDPyî, 8ê teşrîna verêne decenazeya aye Silêmanîye ra ver bi Hewlêrî ameye şawitiş. Nêzdîyê 5 rojan cenaze Hewlêr de ameye vindarnayîş û bi bahaneyê cîya şawitişê cenazeye ame astengkerdiş, pêwa ke bîlet ci rê ame birnayîş zî şawitişê cenazeye bi rayîrê hewa ame astengkerdiş. 5 rojan keye û heyet Hewlêr de bi karûbarê yasayî yê şawitişê cenazeye dir eleqedar bî. La fîrmayê Pegasûs û Turk Hava Yollari pêwa ke bîletê cenaze dayê zî dima ra birnayîşê ci red kerdî.

	 

	Nê ser de keye û heyetê HDPyî cenazeya Nagîhan Akarsele raşteyê teyareyê Hewlêrî ra agêrnayî û ver bi berê sînorî yê Îbrahîm Xelîlî ra kewtî rayîr.

	 

	Dimayê ke cenazeya Nagîhane resa Berê Sînorê Xabûrî, fermandarêke tirkî heqaret cenaze rê kerd. O wext Parlementerê HDPyî yê Şirnexî Huseyîn Kaçmazî reaksîyon vera vatişê eskerê tirkî mojna. Dimayê munaqeşeyî ewraqî ameyî temamkerdiş û cenazeya Nagîhane berê sînorî ra derbazê hetê vakurê Kurdistanî bî.

	 

	Dima ra cenazeya Nagîhane bi rayîrê bejayî, ver bi bajarê aye Konya ameye rayîrkerdiş. Dimayê  kar û barê otopsîyê Sazgehê Tibê Edlî (ATK) ê Konyayî cenazeya Nagîhane semedê definkerdişî ver bi dewa Xelîkan (Golyazî) ê Cîhanbeylî kewte rayîr. Bi seyan kesê ke pêwa astengî û tedayan serê rayîrê dewe de kom bî, bi sloganê "Jin jiyan azadî", "Şehîdî nêmirenê" û "Biciwîyo Serek Apo" cenazeya Nagîhane pêşwazî kerdî. Cenazeya ke bi tililiyê cinîyan ameye pêşwazîkerdiş û serê milê cinîyan de ver bi goristanê dewe berdî.

	 

	Nêzdîbîyayîşê hemverê merasîmê cenazeye, ardişê cenazeye hetê sazgeh û rêxistinê cinîyan ra ame şermezarkerdiş. Derheqê babete de cinîyê ke Wan de ciwîyenê hîs û fehmê xo ajansê ma rê ardî ziwan.

	 

	'Hemverê zulmî de ma do vengê xo berz bikerê'

	 

	Îdarekara Rêxistina Partîya Demokratîke ya Şaran (HDP) ya qezaya Rayîrê Armûşî ya Wanî Zubeyde Ozalp, dîyar kerd ke cenazeyanê kurdan ra tersenê û wina vat: "Astengî û tedayê hemverê cenazeye nîşaneyê tersê hemverê têkoşînê cinîyanê kurdan o. Ma do hemverê qetilkerdiş û qirkerdişî xo ver bidê. Ma do hemverê zîhnîyetê serdestî yê camêrdî de biqerar vinderê."

	 

	'Hêrişê hemverê cenazeyan sûc o'

	 

	Îdarekara Komeleya Cigêrayîşê yê Koçberîye ya Serhadî (GOÇ-DER) ya Wanî Ayten Kiran zî, wina bale ant serê hedefgirewtişê cinîyan û vaqt: "Îqtîdarê AKP-MHPyî cinîyê ke têkoşînê azadîye rayîr ra benê, hedef gênê. Êdî tehemûlê cenazeyan zî nêkenê. No zîhnîyet do qetî birijîyo. Hêzê tarî yê ke  Nagîhane qetil kerd, do rojêke hesab bidê. Astengîyê hemverê merasîmê cenazeyan suc o. No çî nêno qebûlkerdiş. Bêehleqî yo. Ma do semedê cinîyê ke yenê qetilkerdiş, serê lingan de bê û bi hêzêk pîl têkoşînê xo dewam bikerê."

	 

	'Ma wayîrê têkoşînê Nagîhane vejîyê'

	 

	Endama Meclîsê Partîye ya HDPyî Sarya Bîlîcî, qiseykerdişê xo de bale ant serê têkoşînê Nagîhane û wina vat: "Nagîhane bi vindertişê xo û bi têkoşînê xo şexsêke bi hêz bî semedê ma. Hêz da hêza cinîyan. Ewro hemverê qetliaman de roja yewîye ya. Ma do wayîrê têkoşînê cinîyê ke ameyê qetilkerdiş, vejîyê. Ma do têkoşînê xo dewam bikerê."