Waya Gulîzare Nazane: Wa êdî vengê ma bêro eşnawitiş! 

2022-10-15 12:14:33


	 

	 

	AMED - Tehlukeyê cuya Gulîzar Karamane ke rastê hêrişê Azîz Karamanî amebî û merg ra xelisîyabî, hema zî dewam keno. Azîz nika bi rayîrê lajê xo M.Kyî û warezayê xo D.A tehdîtanê xo dewam keno. Waya Gulîzare, Nazane dîyar kerd ke kes goş nêdano vatişanê înan, êdî nêzanê se bikerê û vat: "Wa êdî vengê ma bêro eşnawitiş."

	 

	Azîz Karamanî, amanc kerdibi ke Gûlîzar Karamana ke waştêne peynîya zewacê xo bîyaro, aye qetil bikero. Netîceyê hewildayîşê qetilkerdişî de Gulîzare bi giranî birîndar bî û hema zî Azîz Karaman, bi vatişê xo yê “Ez o karê xo nêmced nêverdî" tehdîd Gulîzare rê keno.  Lajê ci M.K û dezayê ey A.D nê ser de hêrişê Gulîzare û keyeyê ci kenê. Keyeyê Gulîzare qesawetê xo pare kerdî û vatî, wa peynîya her cinî eynî nêbo.

	 

	Gulîzar Karamane (34) 30ê gulane de qezaya Erxenîya ya Amedî de hetê camêrdo bi nameyê Azîz Karamanî ra rastê hêrişê bi çekdarî ameye. Gulîzare dayîka 6 tutan a û bi giranî birîndar bibî û merg ra xelas bibî. Hêrişkar Azîz Karaman zî dimayê remayîşê xo yê 11 rojan hetê cendirmeyan ra ame tepiştiş.  Serdozgerîya Komare ya Erganî derheqê Azîz Karamanî ke bi sucê,  "teşebusê kiştişî" de ame tepiştiş, bi îdiayê "Bi qestî birîndarkerdişê cinîya xo" îdianame amade kerd. 

	 

	2yîn roniştişê dewaya Gulîzare 8ê êlule de 1ine Dadgeha Cezaya Asliye ya Erxanîyê Amedî de ame vînayîş. Heyetê Dadgehe qerar da ke dosya Dadgeha Cezaya Giran de bêro vînayîş û sewbîna qerarê dewamkerdişê tepiştişê ci ame dayîş.

	 

	'Fek gerrekerdişî ra vera bidê...'

	 

	Pêwa hêrişkar Azîz Karaman zîndan de yo zî bi rayîrê lajê xo M.K. Ê 16 serre hem Gulîzare û hem zî keyeyê Gulîzare tehdît keno. Sewbîna demo ke dewaya Gulîzare ameyîne vînayîş, o wext zî M.K keyeyê Gulîzare rê mesaj şawit û vat: "Fek gerreyê xo rê vera bidê. Eke şima nê çî nêkerê, çîyo lazimî ma do bikerê. Karê ke nêmced mendo, ez o temam bikerî."

	 

	Rojê vîyarte M.K reyna bi pîyê xo Azîzî dir pêvînayîş kerd û dimayê pêvînayîşî M. bi çeke hêriş berd serê birayê Gulîzare. Birayê Gulîzare ke birîndar bi, wedarnayî nêweşxane. Dima ra M.K zî ame destbendkerdiş.

	 

	'Hêrişê birayê mi kerdî'

	 

	Waya Gulîzare Nazan Demîrel ajansê ma rê wina qalê serebûtî kerd: "Lajê Azîzî bêmabên ma tehdîd keno. Pêwa Azîz ameyo tepiştiş zî, fek tehdîdanê xo ra vera nêdano. Azîz, hem bi rayîrê lajê xo, hem zî bi rayîrê waya xo û hem zî bi rayîrê lajê waya xo yê A.D.yî tehdîdanê xo dewam keno. Dima ra hêriş berdî serê birayê mi, M.K. û A.D ameyî destbendkerdiş. Semedo ke lajê Azîz M.K. serebût girewt serê xo, A.D. lajê waya Azîzî ame veradayîş. No çî bi zanayîş ame kerdiş."

	 

	'Ma semedê tehdîdan nêeşkenê vejîyê teber'

	 

	Nazane dîyar kerd ke semedê tersê hêrişan, ferdê keyeyî nêeşkenê vejîyê teber û wina vat: "Ma xo mîyanê keyeyî de heps kerdo. Ma nêeşkenê vejîyê. Labelê yê ke tehdîd kenê û hêriş kenê, teber de gêrenê. Bi serberzî hêrişê ma kenê. Cayo ke ê bêrê hepskerdiş, keyeyê mi û Gulîzare mîyanê keyeyî de ameyê hepskerdiş. Her tim tehdîdê sey, 'Ma do peynîya keyeyê şima bîyarê? Nê cesaretî çara gênê?"

	 

	'Gulîzare xo sûcdar kena...'

	 

	Nazane, dewam de wina vat: "Semedo ke nê serebûtî qewimyenê, Gulîzare xo xeylêk sucdar vînena. Xo berpirsîyar vînena. Psîkolojîya aye xira bîya.  Nêeşkena rakewa, nêeşkena rayîr ra şêra, nêeşkena werd biwera. Her çî semedê aye xeylêk giran yeno."

	 

	'Wa Gulîzare nêro qetilkerdiş'

	 

	Nazane tewr peyîn wina veng da: "Kes goş nêdano vatişanê ma. Ma kam ci berî rê da piro, rîyê ma de padayî. Ma êdî nêzanê şêrê ça û se bikerê. Wa êdî vengê ma bêro eşnawitiş. Ma nêwazenê peynîya Gulîzare zî sey cinîyê ke ameyê qetilkerdişî bo. Wa cinîyî nêrê qetilkerdiş. Ganî êdî vengê cinîyan bêro eşnawitiş. Ne dozgerî, ne hukm û ne zî polîsî ma vînenê!"