Merdimê tepişteyan: Bikewê mîyanê tevgerî  

2022-10-10 09:11:31


	 

	ANQARA - Keyeyê tepişteyan ke semedê tepişteyê nêweş û tepişteyê ke înfazê înan ameyo veşnayîş, bêrê veradayîş, reya diyîne şî Anqara û bi partîyê sîyasî dir pêvînayîş kerdî. Keyeyan waşt ke kesê berpirs û selahîyetdarî bikewê mîyanê tevger û gamêke somut bierzê.

	 

	Nobetê Edeletî ke bi amancê tepişteyê nêweşan û tepişteyê ke înfazê înan ame veşnayîş, bêrê veradayîş nobete dabî destpêkerdiş dewam kena. Keyeyê tepişteyan 5ê Çeleyî de Amed, Mêrdîn, Riha, Şirnex, Êlih û Sêrte ra şî Anqara û meclîs de eşkerayîye dayî û dima ra zî partîyê sîyasîyan reyde pêvînayîş kerdî. Keyeyan dosyaya ke amade kerdibî, teslîm kerdî. Pêwa 9 aşmî derbaz bî, tu game nêameya eştiş. Keyeyê ke nobete girewtî, rojê vîyarte de reyna şî Anqara û bi Partîya Atilim Demokrasî (DEVA), Saadet (SP), Partiya Gelecek û Yewîya Tabîbê Tirkî (TTB) dir pêvînayîş kerdî.

	 

	Merdimê tepişteyan ke şî Anqara, derheqê rewşa zîndanan de û serdayîşê partîyê sîyasî de qisey kerdî.

	 

	Dayîka tepişteyê bi nameyê Mehmet Nezîr Gumuş ke 24 serrî yo tepişte yo û zîndanê Bandirma de yo, Hanîfe Gumuşe da zanayîş ke 36 serrî ceza lajê ci rê ameya birnayîş û vat:  “Îzmîr de ez kewta Nobeta Edeletî. Ma edalet û aştîye wazenê. Ganî tepişteyê nêweşî bêrê veradayîş û aştî bi ca bêro. Wa zîndanan ra tabûtî nêvejîyê. Rewşa Aysel Tugluke her ke şina giran bena. Ganî Aysele û heme tepişteyê nêweşî bêrê veradayîş."

	 

	'Xêrcê ma kes wayîrê tutanê ma nêvejêno'

	 

	Hanîfe vat, hemverê binpaykerdişê heqan ê zîndananê Amed, Îzmîr, Wan û Stenbol de keyeyî ameyê têhet û rewşa zîndanan her ke şina xira bena û vat: "Ma venga pêro dayîkan kenê. Tewrê nobetanê ma bibê. Ma wayîrê tutanê xo vejênê. Xêrcê ma tu kes wayîrê tutanê ma nêvejêno."

	 

	‘Tu çîyêk nêame kerdiş'

	 

	Waya tepişteyê bi nameyê Abdulselam Guler ke nêweşo giran o, Încî Altindag zî wina vat: "Wa merdişî nêvirazyê. Wa înfazê tutanê ma nêrê veşnayîş û bêrê veradayîş. Semedê nê ma nobete de yê. Ma bi partîyê sîyasî dir pêvînayîş kerd.  5ê çeleyî de ma şî verê partîyê sîyasî. Ma waştişê xo vatî, înan zî vat; çi destê ma ra bêro, ma do bikerê. Ma meclîs de eşkerayîye da. La tu waştişêk ma bi ca nêame. Edalet bi ca nêardî û tutanê ma vera nêdayî. Yewin waştişê ma veradayîşê tepişteyan o. Waştiş, waştişê merdimayî yo. CHP randevu nêdano ma. La wa CHP baş bizano ke do dore bêro înan zî. Ma venga pêro hetan kenê ke paştdayîş bidê têkoşînê ma."

	 

	‘Ma ber bi ber edalet gêrenê'

	 

	Sabîha Yaku ke lajê ci tepişte yo û Wan ra ameya zî bale ant serê tecrîdê giranî û vat: "Lajê mi Wan de tepişte bi la surgunê Erziromî kerdî. Nika semedo ke îmkan çin o, ez lajê xo nêvînena. Tena semedê lajê xo nê, ez semedê pêro tepişteyan tîya de ya. Ma tîya ber bi ber edalet gêrenê. Semedê zîndanan de cenazeyî nêvejîyê, ma têkoşîn kenê. Yewin waştişê ma veradayîşê tepişteyan o.