Krîzê ekonomîye tesîr serê amadekarîyê zimistanî de kerd 

2022-09-08 14:57:12


	 

	 

	AMED - Sûrê Amedî de cinîyê ke amadekarîyê zimistanî kenê, dîyar kenê ke seba ekonomîye hêzê girewtişî kewto û goreyê serra vîyarte ra tewr tay amadekarî kerdê û vatî, nîmeyê dolaba qeşayî pirr nêkerdê.

	 

	Ver bi peynîya hamnanî cinî dest bi amadekarîya zimistanî kenê. Sebze wuşk kenê, salçe, konserve, tirşî û rîçal viraznenê. Labelê seba krîzê ekonomî welat de goreyê parî, nêeşkenê  amadekarêkê baş bikerê.

	 

	Cinî, dîyar kenê ke emsar seba krîzê ekonomî hêzê girewtişî kewto û vatî , par kîloyê balîcanan bi 3 TL girewtê û 3 çuwal balcanî pewijnayê la emsar kîlo 13-17 TL ya û nêeşkenê çuwalêke bigîrê.

	 

	‘Baxçeyê Hewselî de ma bi xo ramenê’

	 

	Muyessel Bîlbaye berardişê xo yê baxçeyê Hewselî ramitiş kena û amadekarîya zimistanî kena û eynî wextî de berardişan roşena. Muyessele wina vat: “Bi ameyîşê êlule dir ma amadekarîyê zimistanî kenê. Ma yan dolaba qeşayî de yan zî kîler de pawenê. Ma îsotê xo  baxçeyê xo ra arêda. La reyna zî qîm nêkeno.”

	 

	‘Meaş qîmê ma nêkeno’

	 

	Kezîban Aktaşa ke amadekarîya zimistanî kena wina vat: “Ma her tim deyn kenê. Ez bazar ra sebze gêna û amadekarîya zimistanî kena. Ez nane wuşk kena. Zimistanî her çî de şuxulnena. Par ma xeylêk çî amade kerd. La emsar zaf vay o. Hêzê maç in o. 4 tutê mi wendekar ê. Ez ewnîyena di tutanê qijan. Ez cîranan ra deyn gêna. Meaşê mi qîm nêkeno.”

	 

	‘Mi çuwalêke zî pirr nêkerd’

	 

	Kezîbane vat, par xeylêk amadekarî kerda û wina qedêna: “Mi par 2 çuwalî balîcan pewijna. Emsar mi yew zî pirr nêkerd. Ma mecbûrê ke îdare bikerê. Ma çi vajê zî çîyêk nêvuryeno.”

	 

	‘Ma nîmeyê dolabe pirr nêkerdo’

	 

	Necla Çelîke zî reaksîyon vera rewşe da û vat: “Ma seba zimistanî sebze wuşk kenê û tirşî viraznenê. La emsar her çî vay o. Par ma kiloya îsotî bi 3 TL girewtêne, nika 15 TL yo. Balcanî 10 TL . Ma seba zimistanî 500-600 xerc kenê la qîm nêkeno. Par ma bi 100 TL şîne bazar la emsar bi 500-600 TL şinê û reyna zî qîm nêkeno. Ma emsar nîmeyê dolaba xo pirr nêkerda. Verê ma her çî girewtêne. La emsar ekonomî xirab a, cebê ma veng o.”