‘Rêxistinê Heqê Merdiman sucê dewleta tirke peygoş kenê’  

2022-09-04 09:28:26


	 

	 

	 

	Yara Kendeş

	 

	KOBANÊ - Îdarekarîya Meclîsê Ramitişî yê Qezaya Şêranî yê girêdayê Kantonê Kobanî, Lûtfîyê Mehmod derheqê hêrişê dewleta tirke yê serê Mexmûr û Şengalî de wina vat: "Rêxistinê Heqê Merdiman sûcê dewleta tirke peygoş kenê, labelê ma qetî vera kerdiş û plananê lêşinan ê na dewlete de teslîmkarî qebûl nêkenê."

	 

	No demêjê derg o dewleta tirke bêmabên hêriş û tehdîd şarê Kurdî rê kena, sewbîna her rey metod û şiklê hêrişê cîya şuxulnena. Dewleta tirke reyna 29ê Tebaxe de bi xidarî hêrişê Mexmûr û Şengalî kerd û netîceyê ci de xeylêk ziyan û qeza virazyayî. No reya ewil nêyo ke dewleta tirke bi nê rengî hêrîşê Komelê Êzîdî kena û qirkerdiş û qetilaman kena. Teyareyê bêmerdim keyeyêkê welatijê Wargehê Multecîyan ê Şehîd Rustem Cûdî yê Mexmûrî bombavaran kerd. 

	 

	Na çerçawa de Îdarekarîya Meclîsê Ramitişî yê Qezaya Şêranî yê girêdayeyê Kantonê Kobanî, ajansê me rê fikrê xo dîyar kerd.

	 

	'Merdimayîyê ci çin o, metodê merdimayî de nêyo’

	 

	Lûtfîye destpêkê qiseykerdişê xo de vat, merdimayîya înan çin a û wina dewam kerd: “Demo peyên de hêrişê dewleta tirke ya serê tut, cinî û komelî de her ke şino tewr zêde beno. Heme cayê ke şarê kurdî ciwîyeno, binê tehdîdê dewleta tirke de yê. Ma bala xo bidê serebûtê ke Şengal û Mexmûr de rî dayê. Çi heyf bi destê dewleta îşxalkerde ya tirke de bî. Her tim hewldayîşê qirkerdişî serê şarî de yenê kerdiş. Komelê Êzîdî xeylêk zehmetî û tedayê giran dîyê. No ne reyke yo, ne zî di rey o. Dewleta tirke bi nê rengî, şarê Kurdî tehdîd kena. Nê çîyê ke kena merdimayî nêyê.”

	 

	'Ma tu wext kerdiş û plananê lêşin yê dewlete qebûl nêkenê'

	 

	Lûtfîye dewam de wina vat: "Ma sey Pêkerdişê Vakur û Rojhelatê Sûrîye, ma pîya cuyêka hempar hemverê tehdîdê dewleta tirke de benê cewab û sere nêtewênenê. Seba nê zî dewleta tirke gêj bena. Demo ke dewleta tirke yewîya ma û têkoşînê me yê xurt, bi nê rengî vînena, êdî nêzanena senî hêriş bikero û ma zeyîf bikero. Eynî wextî de dewleta tirke hêzê ma yê bîyaye nêeşkena, coka bi teyareyanê bêmerdim hêrişê ma kena. Hêzê cinîyan ê pîlî ra terseno. Ma vanê senî wazeno wa hêriş bikero, ma qetî plananê ci qebûl nêkenê.”

	 

	'Ma do xo bi xo pawitişê xo bikerê’

	 

	Lûtfiye vat, dewletê Mîyanneteweyî û Rêxistinê Heqê Merdiman sûcê dewleta tirke peygoş kenê û vat: "Neteweyê Yewbîyayeyî (NY) û Rêxistinê Heqê Merdiman sûcê dewleta tirke peygoş kenê. Hêrişê bi teyare, tanq, top, obîs, hawan û şerê mîyanên serê ma de kena. Ma do xo bi xo pawitişê xo bikerê. Ma timî veng danê û vanê wa çareserî seba problem û şerî bêro vînayîş la kes xo nêleqneno û vatişê ma derbaz kenê. Wexto ke cayêk bîn de tutî yenê qetilkerdiş, her kes dinya rijneno. Çira tu kes paşta ma nêgîno û nêvano heqê pawitişê tutan wezîfeyê ma yo. Ez sey cinîyêka Kobanî venga  ciwan û cinîyanê ciwanan kena ke ê eşkenê bi fikir û felsefeyê Rayberê Şaran Abdullah Ocalanî de şêrê û xo aver berê.”