Cinî seba Salîha Aydenîze bîyî yew veng: Ma do serbikewê 

2022-08-14 13:19:48


	 

	 

	STENBOL - Cinîyan dîyar kerdî ke qerarê wedaritişê destnêdayîşê Hemsereka DBPyî Salîha Aydenîze, polîtîkaya tecrîdkerdiş û pelçiqnayîşî ya hemverê tevgerê cinîyan o û wina vatî: “Ma do têkoşîn û xoverdayîşê xo dewam bikerê. Tu wext ma do peyser game nêerzê. Ma nê helwestê faşîzan qebûl nêkenê. Bi xoverdayîş û vindertişê xo ma do qezenc bikerê.”

	 

	Rayberê PKKyî Abdullah Ocalanî 23 serrî yo binê şertê tecrîdê giran de Îmraliyî de yeno tepiştiş. Seba  azadîya fizîkî ya Rayberê PKKyî Abdullah Ocalanî 12ê Hezîrane de Rayîr ra şîyayîşê Gemlîkî ame kerdiş. Rayîr ra şîyayîşê Stenbolî de parlamenterî zî ci de xeylêk kesî bi şîdetî dir ameyî rî bi rî. Hemsereka Pêroyî ya DBPyî Salîha Aydenîze ke hemverê polîsan de pawitişê xo kerd, derheqê aye  de Komîsyonê Têmîyanên seba wedaritişê  destnêdayîş 5 fezlekeyî ameyî amadekerdiş û HDP û CHPyî tena rayê, nê şuxilnayî. Seba wedaritişê destnêdayîşê bi rayanê AKP, MHP û Îyî Partî qerarê wedaritişê destnêdayîşî ame dayîş.

	 

	Raporê Komîsyonê Têmîyanî do menga teşrîna verêne de Heyetê Pêroyî bêro munaqeşekerdiş. Cinîyan hemverê wedaritişê destnêdayîşê Salîha de kampanya dayî destpêkerdiş û her ca de bi çalakî û bernameyan waştişê xo anê ziwan.

	 

	Cinî mîkrofonê ma rê qisey kerd û derheqê  polîtîkaya tedaya serê şarê Kurdî û Salîha de ercnayîş kerd.

	 

	‘No hêrişêkê hemverê xeta ma yo’

	 

	Vervatoxa Cinîyan a Kongreya Demokratîke ya Şaran (HDK) ya Stenbolî Dîdem Nur Acabey dîyar kerd ke wedaritişê destnêdayîşê hetê sîyasetê Kurdî û muxalîfan de çîyêkê newe nêyo û wina vat: “Hemsereka KCDyî Leyla Guven û hemsereka pêroyî ya verî ya HDPyî Fîgen Yuksekdag bi cezayê giran ameyî tepiştiş û parlamenterîya înan ameye fînayîş. Ma nê sey hûrişêkê vera sîstemê hemserekî ke seba  ma xeta morî ya, vînenê. Bi nê hêrişan do nêeşkê ma bipelçiqnê.”

	 

	Polîtîkaya tecrîd û pelçiqnayîşî

	 

	Dîdeme dîyar kerd ke ganî hêrişî yewbînan ra cîya nêrê ercnayîş û wina vat: “Pêwa teşîsê demansî Aysele rê ameyo ronayîş û nêeşkena xo bipawa, dadgehê bi zor îfadeyê aye girewt. Seba cinî sîyaset ra bêrê girewtiş, wareyê cuye ra ameyî antiş û Kurdistan û tevgerê cinîyan ê Tirkîya de hêrişêkê cidî est o. Sîyaset de vanê, vatişê cinî çinbo. Ma nê hêrişê topyekun ê hemverê cinîyan cîya nêvînenê.”

	 

	Venga paştdayîşî 

	 

	Dîdeme tewr peyîn wina vat: “Ma zanê ke AKP-MHP û sîstemê serdest yê camêrdan çara hêz gêno. Ma zanê ke senîn patrîyarka hêz gênê. Ganî ma hemverê patrîarka yê kapîtalîst û serdestîyê camêrdan bi hêzê demokrasî û tevgerê cinîyan dir  têkoşînê xo bidê. Ganî pêro hêzê demokratîkî bi rayîrê hîrên dir paştdayîş pîl bikerê.”

	 

	‘Ma nê helwestî qebûl nêkenê’

	 

	Aktîvîsta Tevgerê Cinîyan ê Azadan Gulsen Bîter zî reaksîyon ramojna û vat: “Hukmat hemverê kesê ke verê înan de mîyanê hêrişî de yo. Seba Salîha hemsereka DBPyî ya û wayîrê nasnameyê Kurdî û cinî ya, nê hêrişî yenê kerdiş. Vernîya nê hêrişan zî estbî. Têhetameyîşê şarî, hukmat û sîstemî tersneno.  Bêguman nê hêrişî hembverê nê yewbîyayîşî yê.”

	 

	‘Ma do serbikewê’

	 

	Gulsene tewr peyîn nê çî vat: “Tepiştişê sîyasetmedaran nêno qebûlkerdiş. Ma sey vizêrî ewro zî hemverê nê helwestî yê. Ma cinî ma do pawitişê xo bikerê. Ma do her ware de xoverdayîş bikerê û vengê xo berz bikerê. Ma hemverê nê hêrişan tu wext peyser game nêerzenê. Ma do bi xoverdayîş û vindertişê xo qezenc bikerî.”

	 

	‘Na polîtîkayêke hemverê têkoşînê şarê Kurdî ya’

	 

	Aktîvîsta TJAyî Gulîstan Baran zî reaksîyon vera nê caardişan da û vat: “Na polîtîkayêke hemverê têkoşînê azadîya cinîyan ê Kurdan a. Polîtîkaya dewlete bi nînan zî sînordar nêmanena. Kuçe, keye, û her ca de nê polîtîkayî yenê kerdiş. Ma nê polîtîkayê ke hemverê embaza Salîha de kenê, qebûl nêkenê û nêheqîyêkê pîl o. Têkoşînê cinîyan hemverê nê hêrişan de her tim dewam bikero.”