Merdima tepişteyan: Ganî her kes paştdayîş bido Nobeta Edaletî  

2022-08-13 13:43:02


	 

	ÎZMÎR - Nacîye Guçlu derheqê Nobeta Edaletî ke merdimê tepişteyan daya destpêkerdiş ser o qisey kerd û da zanayîş ke ganî her kes paştdayîş bido çalakîyan û tepişteyê nêweşî bêrê veradayîş.

	 

	Bi amancê tepişteyê nêweşî û yê ke înfazê înan ameyo veşnayîş bêrê veradayîş û şert û mercê zîndanan bêrê sererastkerdiş Îzmîr de 12ê Sibate de Nobeta Edeletî ameye destpêkerdiş û dewam kena. Dayîka Ozgur Guçlu ke zîndanê Şakranî de tepişte yo, Nacîye Guçlu derheqê Nobeta Edaletî de qisey kerd.

	 

	Bi îfadeyê şahidê nimiteyî 30 serrî ceza

	 

	Nacîye da zanayîş ke lajê aye Ozgur 11 serrî yo tepişte yo û senîn kewto 18 serreyê xo, di rojî dima ameyo destbendkerdiş û di serrî dima vetê dadgehe û vat: “Zîndanê Hûmara 2yê Tîpê Tyî Şakranî de tepişte yo. Heyetê dadgehe qerarê ewilî de 60 serrî ceza dayî lajê mi. Serê îfadeyê şahidê nimite estbi. La delîl çinîbî. Şahid bi SEGBÎSî tewr bi. Îfadeyê ci sey yewbînan nêbî. Avûkatan ci ra pers kerd û vat, ‘Di serrî dima to senîn nas kerd’. Şahidî vat, ‘Belkî reng vuryayo’. Ma muracatê DMMEyî kerd. Dadgerê dadgehe û çend kesê bînî seba ke rêxistinbîyayîşê cemaetî de bî, ameyî tepiştiş. Dima ra Dadgeha Destûrê Bingehîn qerar xira bi û ceza vejîya 30 serrî.”

	 

	Wa bêrê veradayîş

	 

	Nacîye dîyar kerd ke her tim şinê zîndan û wina vat: "Ma pêvînayîşan de qisey nêkenê. Uca de teda estê. Ma pêvînayîşan de vengê xo vejê, cezaya dîsîplînî danê. Seba her çî ceza danê. Xora bi desine rey ceza dayî. Seba tehlîyeyê înan ameyê, poşmanî ferz kenê. La heqê tehlîye xora ameyo. Embazêkê lajê mi est o 10 serrî cezaya ey qediyayo la 6 aşmî yo înfazê ey veşnayê. Yê ke cezaya înan qediyaya vera nêdanê. Embazê ey Zana vera nêdanê. Înfazê ey veşnayî."

	 

	‘Ganî edalet xoser bibo’

	 

	Nacîye vat, seba ke nêweş a, nêeşkena tewrê nobeta edaletî biba la paştdayîş dana û vat: “Ez nêweş a gurçikî ya. Mêrdeyê mi nêweşê diyalizî yo. Ma  Asarlikî de nişnenê ro. Şîyayîş û ameyîş zehmet o. Ma seba nê nêeşkenê tewr bibê. Abdullah Ece qetil kerdî. Nêweşê 73 serrî vera nêdayî. Çira? Gerek lajê mi bişîne nêweşxane la nêşawenê. Hîrê rojî dima dayê. Gelo edalet est o? Ganî tepişteyê nêweşî bêrê veradayîş. Eke dayîkî vejîyê kuçeyan do edalet bi ca bêro. 40 serrî yo zulm est o. Çiqas zulm bikerê zî ma do rojêke serbikewê.”

	 

	‘Ganî her kes paştdayîş bido’

	 

	Nacîye tewr peyîn qiseykerdişê xo de vat ke ganî merdimê tepişteyan paştdayîş bidê Nobeta Edaletî û wina qedêna: “Rojêke beno ke bêro sereyê her kesî. Ganî tena dayîkê tepişteyan ney, pêro dayîkî vejîyê meydanan. Tena Kurdî ney, ganî her kes paştdayîş bido.”