Hêrişê dewanê Qamişlo û Hesekî kerdî 

2022-08-08 14:19:15


	 

	MERKEZÊ XEBERAN - Artêşa tirke û komê paramîlîterî yê girêdayeyê ci saetê serê sibayî de dewanê qezayanê Dirbêsiyî, Amûde, Zirgan û Til Temirî yê Vakur û Rojhelatê Sûrîye bombavaran kena.

	 

	Artêşa tirke saetanê serê sibayî ra dewanê qezayan ê Dirbêsiyî, Amûde, Zirgan û Til Temirî yê Vakur û Rojhelatê Sûrîye bombavaran kena. Goreyê xebera Ajansê Xeberan ê Hawarî (ANHA); artêşa tirke dewanê; Qermane, Şemsûra û Çeteliyî yê rojawanê Dirbêsiye yê Kantonê Hesekî de bi çekanê giran bombavaran kena.

	 

	Bi hawayêke hemwext dewanê; Xanika, Keramê, Cirnikî yê girêdayê bajarokê Topo yê Amûde ya Kantonê Qamişlo zî yenê bombavarankerdiş. Eynî wextî de ame zanayîş ke artêşa tirke û komê paramîlîterî yê girêdayê ci Taxa Xerbî ya qezaya Zirganî zî bi çekanê giran hedef girewt. Netîceyê hêrişî de ziyanê madî ameyî meydan.

	 

	Eynî saetan de bi çekê giran dewa Gir Topî ya rojhelatê bajarê Qamişloyî hedef ameye girewtiş. Eynî demî de hêrişê dewanê Gozeliye û Til Leben yê rojawanê Til Temirî zî yeno kerdiş.

	 

	Hêrişê serê mintiqa dewam kenê û derheqê netîceyê hêrişî de heta nika zanayîşê zelal nêameyê girewtiş.