Summeye Koç: Rojeva ma de esteyê ke Heweg de ameyî vînayîş estê 

2022-08-08 11:28:09


	 

	Şehrîban Aslan

	 

	RIHA - Hemsereka ÎHDyî ya Rihayî avûkate Summeye Koç derheqê esteyê ke Heweg de ameyî vînayîş ser o qisey kerd û vat: “Ma venga kesê ke xebera înan esta û şahidê serebûtî yê kenê; na babetêka xesas a, seba berpirsyarîyê wijdanî bigîrê serê xo û dejê keyeyan tay bo zî kêm bibo, wa paştdayîş bidê dosyaya cipersayîşî.”

	 

	Taxa Arabukî ya Hewegî ya Rihayî de 7ê Hezîrana 2022ine de serê erdêke de kar û barê pakitîyê kerreyan de hîrê çuwalê cîya yê binê herre de ameyî vînayîş û çuwalan de esteyê aîdê merdiman ameyî vînayîş. Ame zanayîş ke wayîrê erdî Anqara de ciwîyeno û dimayê ke xebere ameye girewtiş, 21ê Temmuze de Walîtiya Rihayî îxbar kerd. Rojêke dimayê îxbarî cenderme şî cayê serebûtî û binê muşahedeyê dozgerî de kolênayî. 

	 

	Hemsereka ÎHDyî ya Rihayî avûkate Summeye Koç derheqê babete de qisey kerd û dîyar kerd ke seba aqûbetê esteyan bimusê, muracat kerdê.

	 

	‘O wext Sedat Bucak û keyeyê ci estbî’

	 

	Summeye da zanayîş ke selahîyetdarê dewlete na babete ser o qet çîyêk nêvanê û vat: "Tena hîn kar û barê ke hetê dewlete ra ameyê kerdiş çin ê, o wext hîn komî serê nameyê dewlete de çî kerdêne estbî, yanî qoricî estbî. Seke yeno zanayîş Sedat Bucak û keyeyê ci estbî. Derheqê kesê ke ameyê desteserkerdiş de tu xebere nêameye girewtiş. Sey yeno zanayîş reyna Dayîkê Şemeyî yê komeleyê ma estê. Nê dayîkî bi serran o Meydanê Galatasarayî de seba muhakemekerdişê gumanbaran têkoşîn kenê."

	 

	‘Gumanbarî hema yenê pawitiş’

	 

	Summeye dewam de nê çî vat: "Heta ewro hîn merdimê ke esteyê înan ameyê vînayîş, estê. Pêro vindîbîyayeyî nêameyê vînayîş. Pêwa nê zî seba  cezakerdişê hîn wezîfedarê îstîmlakî ke serebûtê vînîkerdişan de ca girewtê, tu çîyêk nêame kerdiş. Astengîyê vernîya çalakîya Dayîkê Şemeyî zî mojneno ke polîtîkaya bêcezaverdayîşî bi hawayêke eşkera dewam kena. Hema zî zîhniyet nêvuryayo. Gumanbarî yenê pawitiş. Mexdûr û keyeyan zor û zehmetîyan de verdenê."

	 

	‘Dewlete keyeyan şawena verê Sedat Bucakî’

	 

	Summeye dîyar kerd ke merdimê vindîbîyayeyan muracatê înan kenê û vat: “Selahîyetdarî cewab danê. La selahîyetdarî vanê, kes destbendkerde çin o û aqûbetê înan şima eşkenê Sedat Bucakî ra bimusê. Nê bixo selahîyetdarê dewlete vanê. Keyeyî şinê verê Sedat Bucakî û vano, hîn kesî destê ey de yê û do vera bido. Vano ke beşo bîn zî do dima ra vera bido. Hîn muracatê ma rê yenê kerdiş de vanê, Sedat Bucak îşkence merdimanê înan rê kerdo. No zî yeno manaya ke nê binê zanayîşê dewlete de benê. Eke dewlete muracatan de vernîya merdiman dana Sedat Bucakî, o wext zanayîşê înan her çî rê esto. Demek  qebûl kenê ke nê kesan zî muhakeme nêkenê.”

	 

	‘Esteyî tewr tay aîdê di merdiman ê’

	 

	Summeye bale ant serê esteyê ke Heweg de ameyê vînayîş û vat: “Rojava ma de esteyê ke ameyê vînayîş estê. Ma nê prosesî bi OHDyî dir rayra benê. Dimayê muracatî ma şî verê dozgerî. Dozgerîye vat, hîn esteyî ameyê vînayîş. La şahidê ke este vînayî, vatî ke beno esteyî aîdê hîrê kesan bê. Vat, esteyêke sereyî esto. La dozgerîye vat, hîrê esteyê uyluk estê. Na nuqta de vatişê dozgerî û şahidan yewbînan nêkenê. Ma do zî cigêrayîşan dewam bikerê. Ma pisporê tipê edlî ra zî fikr girewt. Pisporan vat, esteyî tewr tay aîdê di merdiman ê.”

	 

	Sumeyye vat, esteyî nika ATKyê Stenbolî de yê û wina qedêna: “Do biewnê ke eşkenê serê esteyan de cigêrayîş bikerê yan ney. Eke bêrê kerdiş, do keyeyan ra nimûneyê DNAyî bigîrê û bîyarê hemverê yewbînan. Sey mi vat, nika rojeva ma de esteyî estê. Ma cipersayîş kenê. Seba pabebîyayîşê keyeyan bi ca bêro, ma tewrê dosya bî. Ma venga kesê ke zanayîşê înan esto kenê û şahidê serebûtîyê kenê; na babetêka xesas a, seba berpirsyarîyê wijdanî bigîrê serê xo û dejê keyeyan tay bo zî kêm bibo, wa paştdayîş bidê dosyaya cipersayîşî.”