‘Bi destê dewlete qirkerdişî yenê teşwîqkerdiş’ 

2022-08-06 15:22:07


	 

	 

	Oznur Deger

	 

	ANQARA - Sekretera Pêroyî ya Meclîsê Cinîyan ê Komeleya Pîr Sultan Abdalî Rukîye Kara reaksîyon hemverê veradayîşê di gumanbarê ke hêrişê sazgehê Elewî û cemxaneyan kerdibî, mojna û da zanayîş ke hêrişî bi çend kesan nênê kerdiş, dewlete qirkerdişan  teşwîq kena.

	 

	Anqara de roja ewilî yê Roceyê Muharremî de  hemverê Cemxaneyê Fatma Ana, Cemxaneyê Şah-i Merdan, Komeleya Dewa Gokçebelî û Weqfa Elewî-Bektaşî ya Tirkmenan de 31ê Temmuze de bi hawayêke hemdem hêriş ame kerdiş. Eşkerayîye de ame vatiş ke hêrişî hetê kesêkê ra ameyê kerdiş û hêzê pey hêrişî ameyî nimitiş.

	 

	Dimayê hêrişî hetê serdozgerîya komare ya Anqarayî ra cipersayîş ame destpêkerdiş û Çagdaş Can Bardakçi, Baver Gul û Ahmet Ozan Karaca ameyî destbendkerdiş û dimayê çar rojî destbendkerdişî Ahmet Ozan Karaca ame tepiştiş û Baver Gul û Çagdaş Can Bardakçi zî cezaya hepsê keyeyî dayî û vera dayî. 

	 

	Sekretera Pêroyî ya Meclîsê Cinîyan ê Komeleya Pîr Sultan Abdalî Rukîye Kara derheqê babete de ercnayîş kerd.

	 

	Rukîye dîyar kerd ke hêrişê hemverê elewîyan her tim bîyê û seba elewîyî demokrasî wazenê her tim bîyê hedefê hêrişan û wina vat: “Xoverdayîş zîhnîyetê tarî nêrehet keno. AKP îdeolojiyê peyserî paweno. Ma qirkerdişê Mereş, Sêwas, Koçgirî ciwîyayî. Nê hêrişê neweyî nêyê.”

	 

	‘Binê kontrolê dewlete de yenê kerdiş’

	 

	Rukîye, dîyar kerd ke polîtîkayê AKPyî hêrişkarî wey kenê û wina vat: “Hîrê ciwanî binê kontrolê dewlete de hêriş kenê. Nika zî bahaneyê sey tîryakî xebitnayê, vejenê vernî. La ma hemverê nê de bêveng nêmanenê. Ma fek têkoşîn ra vera nêdanê. Ma her tim mîyanê têkoşînî de yê. Îqtîdar tena hemverê elewîyan de ney, hemverê heme ganeyan de, daristanan de dişmin o. Îqtîdar roşnayî ra terseno. Ma herre, çem, darê na herre yê. Na herre ya ma ya. Hemverê kesê ke dinyaya xo bedelnenê de rêzdarî çin a. Dewlete bi kanalanê xo hewl dana Elewîyan asîmîle bikero.”

	 

	‘Hêrişkar senîn ameyo tîya?’

	 

	Rukiye vat, AKP serê ciwan û pîranê elewîyan de polîtîkayê cîya rayra beno û vat: “300 pîranê ma hecî rê dawet kerdê. 400 ciwananê ma dawetê Haci Bektaşî Velî kerdî. Çira Diyanet dawet nêkeno, çira wezareta turîzmî keno? Asîmîlebîyayîş tîya ra danê destpêkerdiş. Dimayê nê dawetan ma nuşteyêke pare kerd. Hêrişî zî dimayê nê bi ca ameyî. Dimayê ke ma ê nuşteyî pare kerdî, hêrişkar Îzmîr ra yeno. Cemxaneyê Şah-i Merdan cayêkê zaf cîya de yo. Kesêkê uca baş nêzano, nêeşkeno hende rehet bivîno. La ey nuqteya ke elewî ci de ciwîyenê, musayo. Gelo senîn musayo? Gumanbar bi tena sereyê xo nêeşkeno nê hêrişî bikero. Ez qerarê hukmî zî şermezar kena. Bi destê dewlete qirkerdişî yenê teşwîqkerdiş. La no welat do hemverê tarîtî sere nêtewêno.”