‘Ma do seba Aysel Tûglûke meydanan de bê’ 

2022-08-06 13:36:11


	 

	Sema Çaglak

	 

	ŞIRNEX - Cinîyê Şirnexijî dîyar kerdî ke qerarê hemverê sîyasetmedara kurde Aysel Tugluke yenê dayîş, caardişê tecrîdî yo û venga serbestveradayîşê Aysele kerdî û vatî: "Ma zulmo ke tepişteyê nêweşan rê yeno kerdiş, qebûl nêkerê û sewbîna ma do wareyan de bibê vengê Aysele." 

	 

	Hemsereka Kongreya Komeleyê Demokratîke (KCD) ya verê û parlamentera Partîya Demokratîke ya Şaran (HDP) ya verê sîyasetmedara kurde Aysel Tugluke seba nêweşîya ci ya demansî, rewşa aye giran a. Dezgehê Tibê Edlî (ATK) reya hîrên raporê “eşkena zîndan de bimana” da. Sewbîna 1ê tebaxe de muhakemekerdişê Dewaya 28ê Sibate de Serekê diyîn ê Fermendarîya Pêroyî ya serdemî Çevik Bir cezaya muebetî amebî birnayîş. Labelê seba teşhîsê demansî yê Çevik Birî ATKyî raporê 'nêeşkeno zîndan de bimano’ da û ame tehliyekerdiş. Eynî roje de zî Dewaya Kobanî de pawitişo bi zor Aysele rê ame ferzkerdiş. 

	 

	Hemverê muhakemekerdişê Aysel Tugluke reaksîyon  û nêrazîbîyayîş her ke şino zêde beno. Cinîyê Şirnexî venga veradayîşê Aysel Tûglûke kerdî.

	 

	‘Aysel Tugluke binê tecrîd û îşkenceyî de ya’

	 

	Endama Partîya Ameyoxî ya Çepê Keskî Elfesya Nas, dîyar kerd zulmo ke serê Aysel Tugluke de yeno kerdiş, tecrîdêkê pîl o û wina vat: “Tecrîdo ke Îmrali de dest pêkerd, ewro hem vera tepişteyan û hem zî hemverê her beşê komelî de xo dano teber. Aysel Tugluke meydanê sîyasetî de wayîrê rolêkê muhîm gêna. Hem embazêke rayber, hem zî kedkar a. Dimayê ke cenazeya dayîka Aysel Tugluke gor ra ameye vetene, tesîr serê Aysele de kerd. Bi xususî dimayê ê serebûtî weşîya Aysele bî xira. ATKyî zî hemverê Aysel Tugluke helwestêkê hetgir nîşan dano. Îşkence û tecrîdê serê Aysel Tugluke ganî nêro peygoşkerdiş.”

	 

	‘Ma seba Aysele wareyan de bê’

	 

	Elfesya dîyar kerd ke hemverê sîyasetmedaranê kurdan ê cinîyan de helwestêkê xirab est o û vat: “Nê çî xo dewaya Kobanî de zî bi hawayêke verbiçim ramojna. Labelê sîyasetmedarê kurdî her rewşe de zî xo ver danê û hemverê zulmî de vejênê. Dewaya Kobanî de Aysel Tugluke rê pawitişê bi zorî ci rê ame ferzkerdiş. Îşkenceyêkê bi nê şiklî bi tu hawayî nîno qebûlkerdiş. Gerek heme komel seba Aysel Tugluke vengê xo tewr berz bikero. Ma meydanan de bibê vengê Aysele."

	 

	‘Ma bibê vengê Aysele’

	 

	Îdarekara HDPyî ya qezaya Hezexî Leyla Tatli zî wina vat: “Dewlete faşîzmê xo serê cinîyan, tepişteyan û serê Şarê Kurdî bi her metodî mojnena. Embaza ma Aysel Tugluke siyasetmedarêke erjaye ya û binê zulmê Dewleta Tirke de weşîya aye her ke şina cirab bena. Hemverê Aysel Tuglûke de îşkenceyêkê psîkolojîk est o. Ma bingehê faşîzmê Dewleta Tirke zanê. Coka ganî ma bibê vengê Aysele. Seba ke ma netîce bigîrê, xebate û têkoşîn ganî bêro kerdiş.  Bêguman nika seba Aysel Tûglûke çalakî yenê kerdiş labelê qîm nêkenê. Lazim o ke ma rewşa Aysele  rojeve de verdê." 

	 

	‘Ma nê zulmî qebûl nêkenê’

	 

	Şemsî Yaman zî dîyar kerd ke hêrişêkê hemverê nasnameyê cinî û kurdbîyayîşî est o û wina vat: “Ma wazenê bi xususî tepişteyê nêweşî yê giranî bêrê veradayîş. Aysele nê zulm û îşkenceyî heq nêkena. Şexsê Aysele de hemverê cinî û kurdan de zulm kenê. ATK û sazgeh û rêxistinê mîtanneteweyî  hemverê Aysele de xemsar ê û no nêno qebûlkerdiş. Ma sey cinîyê kurdî hemverê nê bêhuqûqî û zulmî de têkoşînê xo pîl bikerê. Ganî hemverê nê de tu kes bêveng nêmano.”