Emîne Şenyaşar: No xoverdayîşê edaletî yo 

2022-07-30 15:21:35


	 

	RIHA – Keyeyê Şenyaşarî çalakîya xo ya Nobeta Edaletî dewam keno. Çalakîya ewro de keyeyî serê medyaya dîjîtale de bi hashtagê “#ARTIKDURDIYORUZ" nê mesajî pare kerd: "Do tarîx kesê ke keyeyê mi nêweşxane de qetil kerdî û lajêkê mi zî 4 serrî yo zîndan de yo xo vîr ra nêkero."

	 

	Merdim û pawitoxê parlamenterê AKPyî Îbrahîm Halîl Yildizî 14ê hezîrana serra 2018ine de Pirsûsê Riha de hêrişê dikanê keyeyê Şenyaşar kerd. Netîceyê hêrişî de cinî û 2 lajê dayîka Emîne Şenyaşare ameyî qetilkerdiş. Seba ke kiştoxî bêrê muhakemekerdiş û tepiştiş, Emîne Şenyaşar û lajê ci Ferît Şenyaşar ke qirkerdiş ra bi birîndarî xelas bibi, 9ê adara serra 2021ine de vernîya Edlîyeyê Riha de dest bi Nobeta Edaletî kerdibî. Çalakîya keyeyî roja 509ine de zî dewam kerd. Peynîya hewteyî de berê edlîye qefilnaye yo coka keyeyî çalakîya xo Pirsûs de dewam kerd.

	 

	Keyeyî derheqê babete de serê hesabê xo yê medyaya dîjîtalî de  bi hashtagê  “#ARTIKDURDIYORUZ” nê mesajî pare kerd: "No xoverdayîşê mi nêyo, xoverdayîşê edaletî yo. Xoverdayîşê aye yo ke edaletê Rihayî kerdê binê herrî, reyna uca ra vejê. Do tarîx kesê ke keyeyê mi nêweşxane de qetil kerdî û bi 4 serrî yo lajêkê mi zîndan de verdenê xo vîr ra nêkero."