'Yê ke cinîyan çin hesibnenê ma zî înan çin hesibnenê' 

2022-07-26 12:47:44


	 

	 

	AMED - Avûkate Elif Îpek Tirenç Ulaşe derheqê qerarê Peymana Stenbolî ke Dadgeha Berzî dabî qisey kerd û vat: "Tehemulê ma yê hemverê nênaskerdişê heqê cinîyan de çin o. Yê ke cinîyan çin hesibnenê, ma zî înan çin hesibnenê."

	 

	Serekkomarê AKPyî Tayyip Erdoganî dimayê ke qerarê antişê  Peymana Stenbolî dabi, cinîyan dewa Dadgeha Berzî akerdî. Dimayê dewaye Daîreyê 10in ê Dadgeha Berzî qerarê feshkerdişî tesdîq kerd. Cinîyan nê ser de her cayê welatî de dest bi çalakîyan kerd.

	 

	Endama Komeleya Cinîyan a Rosaye û avûkate Elif Îpek Tirenç Ulaşe qerarê Dadgeha Berzî ercna.

	 

	'Dewayê betalkerdişî ameyî akerdiş'

	 

	Elife da zanayîş ke Peymana Stenbolî têduştîyê cinsê komelî pawit o û wina vat: "Heme welatê ke na peymane îmza kerdî zî têduştî pawitî. Tirkîya her çiqas na peymane îmza kerd zî pratîk de bi ca nêard. 20ê Adara 2021î de zî nîmeyê şewe antişê peymane ame îlankerdiş. Cinîyan hemverê nê de zî reaksîyonê xo ramojnayî. Baroyan, rêxistinê huqûqî, hekîmê didanan, dermankarî, doktorî, muhendisî, rêxistinê cinîyan, partîyê sîyasî, pawitoxê heqê merdiman û xeylêk kesî hemverê nê qerarî de muracatê Dadgeha Berzî kerdî û dewaya betalkerdişî ameye akerdiş."

	 

	'Komel peymane rê wayîr vejîya'

	 

	Elife dîyar kerd ke komel peymane rê wayîr vejîya û vat: "Her çiqas peymane hetê kesêk ra ameyo feshkerdiş zî komel vera nê de reaksîyon ramojna. Hetê daîreyê dewaya Dadgeha Berzî ra bi vengê zêde dewa bi bahaneyê goreyê qanûn û huqûqî ameyî redkerdiş. Ma sey cinîyan persa, 'Dadgeha Berze de merdimê huqûqî û dadgerî estê'. Ma prosesê muhakeme de cewabê no persî gêrayî."

	 

	'Yê cinîyan çin hesibnenê ma zî înan çin hesibnenê'

	 

	Elife vat ke Dadgeha Berze bi nê qerarî ramojna ke têduştîyê cinsî yê komelî û heqê cuye nas nêkena û wina qedêna: "Xora caardişê feshkerdişî, bi tena sereyê xo yeno manaya îlankerdişê dişminîyê cinîyan. Cinî tarîx ra heta nika xo ver danê. Ma sey cinî, pawitoxê heqê merdiman ê cinîyan û Komeleya Cinîyan a Rosaye perçeyêkê têkoşînî yo. Tehemulê ma yê hemverê nênaskerdişê heqê cinîyan de çin o. Yê ke cinîyan çin hesibnenê, ma zî înan çin hesibnenê."