'Ma seba Aysel Tugluk venga edaletî kenê' 

2022-07-24 15:38:43


	 

	 

	ANQARA - Akademîsyene Yasemîn Ozgun dîyar kerd ke bi 500 rojî yo seba sîyasetmedara tepişteya nêweşe Aysel Tugluk waştişê edaletî kenê û wina vat: "Pêwa problemê aye yê weşîye yê giran estê zî Aysel Tugluke zîndan de esîr ameya girewtiş. Seba azadîya Aysel Tugluke ma reyke bîn venga edaletî kenê."

	 

	Platformê Cinîyan ê Anqarayî bi mebesta veradayîşê sîyasetmedara kurde Aysel Tugluk ke tepişteya nêweşe ya û teşhîsê demansî ci rê ameyo kerdiş û 500 rojî yo nîna veradayîş, Yewîya Mulkiyeyiyan eşkerayîye da. Eşkerayîye de pankartê “Pêwa ke teşhîsê demansî ci rê ameyo kerdiş zî Aysel Tugluk bi 500 rojî yo nîna veradayîş" amebi akerdiş.

	 

	Eşkerayî de akademîsyene Yasemîn Ozgun dîyar kerd ke sibata serra 2021ine de Nêweşxaneyê Seka yê Dewlete de teşhîsê demansî seba  sîyasetmedare Aysel Tugluk ameyo kerdiş û wina vat: "Nêweşîya Aysele roje bi roje aver şina. Pêwa nê zî 3in Heyetê Îhtîsasî yê Sazgehê Tipê Edlî (ATK) seba Aysele vat; 'eşkena zîndan de bimana û xo rê biewna.’ Raporo tewr peyîn ê 22yê hezîrane de ameyo amadekerdiş zî bêhet nîyo û dûrê zanistî yo. Nê raporî de zî fikrê rêxistinê weşîye ameyî peygoşkerdiş. Qerarê ATKyî yê derheqê Aysel Tugluke de, qerarê sîyasî yo. Kesê ke bi nêweşîya demansî kewenê, nêeşkenê bi tena sereyê xo lazimîyê xo bikero û demê ameyox de rayîr ver bi netîceyê mende yê giran akeno. ATK bi domnayîşê na rewşe dir suc keno. Ma do fek teşhîrkerdişê nê sucî vera nêdê û têkoşînê xo yê seba azadîya Aysele û tepişteyê nêweşan dewam bikerê."

	 

	Yasemîne, da zanayîş ke Aysele temamê cuya xo seba azadîya cinîyan derbaz kerd û wina qedêna: "Coka zîndan de ya. Îqtîdarê camêrdê serdestî tehemûl nêkeno ke wareyê sîyasetî de cinî bibê. Bi rayîrê muhakemeyî zî Aysel Tugluk û bi desan siyasetmedaranê cinîyan zîndan de verdeno. Bi nê wazenê ke cinîyan bêveng bikerê û bikerê mîyanê çar dêsan. La wa no zîhnîyet baş bizano ke ma estbî û ma do tim bibê. Seba Aysele her çar hetê dinya de serewedaritîşî pîl benê. Ma seba Aysele reyke bîn veng danê û seba Aysele û pêro nêweşan waştişê edaletî kenê."

	 

	Eşkerayîye bi çepikan xelas bî.