Hemverê poşmanî vejîya înfazê ci ame veşnayîş 

2022-07-21 12:05:56


	 

	 

	Sema Çaaglak

	 

	ŞIRNEX - Mehmet Paksoy ke 14 serrî yo tepişte yo û nika zîndanê Eskîşehîrî de yeno tepiştiş, waya ey Safîye Paksoye dîyar kerd cezaya Mehmetî qedîyaya la seba ke hemverê poşmanî vejîyayo, înfazê ey ameyo veşnayîş.

	 

	Teda û binpaykerdişê heqan ê hemverê tepişteyan peynî nêbenê û nê caardişî sey metodêko îşkenceyî yenê xebitnayîş. Bi muameleyê kêfî yê hemverê tepişteyan, veşnayîşê înfazî û nêtedawîkerdişê tepişteyê nêweşê tepişteyî yenê tecrîdkerdiş. Mehmet Paksoy zî yew ê tepişteyan ra yo ke pêwa cezaya ey qedîyaya seba ke poşmanî qebûl nêkerd, înfazê ey ame veşnayîş. Waya Mehmetî, Safîye Paksoy seba birayê xo venga hîsgêrî kerd û waşt ke birayê aye lezabez bêro veradayîş.

	 

	‘Ma 3 serrî yo nêeşkenê ey bivînê'

	 

	Mehmet Paksoy serra 2008ine de Colemêrg de ame tepiştiş. Nêzdîyê 2 serrî Wan de tepişte mend. Uca ra zî ardî Bedlîs û uca ra zî surgunê zîndanê Gîresûnî ame kerdiş. Mehmet nika zîndanê Eskîşehîr de yo û 14 serrî yo tepişte yo. Waya Mehmetî, Safîye Paksoy dîyar kerd ke ê 3 serrî yo nêeşkenê pêvînayîş bikerê û wina vat: "Tedayê serê tepişteyan her wext estbi la nê serran de tewr zêde kerdê. Pêro tepişteyî binê tecrîdêko giran de yê. Ma 3 serrî yo nêeşkenê şêrê pêvînayîşê birayê mi. Hem seba pandemî hem zî seba şert û mercan ma nêeşkenê şêrê. Seba ma ra xeylêk dûrî yo. Her tim surgunê bajaranê dûran kenê û seba dûrbîyayîşê rayîrî û nêweşîyan dadî û babîyê mi nêeşkenê ey bivînê."

	 

	'Înfazê ey ame veşnayîş'

	 

	Safîye dîyar kerd ke bi zanebîyayîş înfazê tepişteyan veşnenê û wina vat: "Cezaya ey emsar menga adare de qedîya la poşmanî ci rê ferz kerdî û seba ke qebûl nêkerd înfazê ey ame veşnayîş. Birayê mi xora bi serran o binê destê înan de yo û dimayê hende serrî çira poşmanî qebûl bikerî.  Vano 'ez tu wext poşmanî qebûl nêkena' û pêwa cezaya ey qedîyaya zî ey vera nêdanê."

	 

	‘Nê zulmî rê êdî bes o'

	 

	Safîye tewr peyîn wina vat: "Tepişteyan kenê hucreyê yew kesî. Zîndanan de îşkenceyêk pîl est o û tepişteyî seba ke hemverê nê îşkenceyî vejênê, kenê hucreyê yew kesî. Ma zî rewşe û weşîye tepişteyan ra bi qesawet ê. Tepişteyê nêweşî estê ke nînê dermankerdiş. Tepişteyî bêsuc ê û ganî pêro serbest bêrê veradayîş. Xeylêk tepişteyî estê ke cezaya înan qedîyaya û keyeyî hêvîya vînayîşê înan ê. La seba ke înfazê înan yeno veşnayîş hem tepişteyî, hem zî keyeyî dej ancenê. Bes o êdî nê zulmî rê. Ganî edalet û huqûq bi ca bêro. Lazim o ke tu kes seba rewşa tepişteyan bêveng nêmano û seba na rewşe pêro keyeyê tepişteyan û kurdî vengê xo berz bikerê û ganî tifaqê xo bi ca bîyarê."